Әлемде адамдардың шамамен 10%-ы солақай болса да, спортта олардың үлесі әлдеқайда жоғары екені анықталды. Ғалымдар жүргізген зерттеу нәтижесінде солақай спортшылардың кейбір жарыстарда айқын артықшылыққа ие екені белгілі болды. Жұмыс Royal Society Open Science (RSOS) журналында жарияланған, деп хабарлайды turkystan.kz.
Зерттеушілер семсерлесу, үстел теннисі, теннис және бадминтон сияқты спорт түрлеріндегі халықаралық рейтингтерді талдаған. Белгілі болғандай, үздік спортшылар арасында солақайлардың үлесі орташа көрсеткіштен әлдеқайда жоғары. Мәселен, үстел теннисіндегі әлемдік «топ-50»-дің 20%-дан астамы — солақайлар.
Мамандардың айтуынша, оңақай спортшылар көбіне бір-біріне үйренген, ал солақай қарсылас олардың әдеттегі ойынына тосын өзгеріс енгізеді. Нәтижесінде солақайлар күтпеген қимылдар жасап, басымдыққа ие болады. Әсіресе жоғары деңгейдегі жарыстарда бұл ерекшелік айқын сезіледі.
Ғалымдар бұл құбылысты солақайлардың ерекше бәсекелестік артықшылығы барын дәлелдейтін мысал деп бағалап отыр. Олар жылдам реакция мен шабуылдағы ерекше бұрыш шешуші рөл атқаратын динамикалық спорт түрлерінде аса тиімді.
