Қазір мектептерде ер мұғалімдер азайып барады. Дегенмен ауылдық жерлерде ұстаздық етіп жүрген ер-азаматтарымыз жетерлік. Олар отбасында да, мектепте де балаларға жан-жақты тәрбие беріп, үлгі көрсетіп жүр.Осындай ұстаздардың бірі – Мұнар Шабенов. Ол Ақтөбе облысы Алға ауданы Аманкелді ауылында тұрады. Осы ауылдағы негізгі мектепте мұғалім болып жұмыс істейді. Жары Балшырын Қалиева екеуі отбасында бес бала тәрбиелеп отыр.
– Зайыбым екеуміз 2009 жылы отау құрдық. Бүгінде отбасында бір қыз, төрт ұл тәрбиелеп отырмыз. Екеуміз де Аманкелді негізгі мектебінде мұғалім болып жұмыс істейміз. Жас ұрпаққа сапалы білім мен тәрбие беру жолында қызмет етіп қана қоймай, отбасында да балаларымыздың дұрыс жолда өсіп-өркендеуіне бағыт-бағдар беріп отырамыз. Әсіресе, заман талабына сай білім алуына, болашаққа сеніммен қарауына жағдай жасап, балалардың тәрбиесіне ерекше көңіл бөлемін. Ұл әкеге еліктейді, сондықтан үш жастан кейін ұл бала өзін әкесімен салыстырып өседі. Әкенің қимыл-әрекетін, әдетін, мінезін өзіне сіңіре бастайды. Әке бойындағы қасиеттерден нәр алады. Сол арқылы тұлға болып қалыптасады. Сол үшін әр кез мектеп өміріндегі іс-шараларға ұлдарыммен бірге қатысып, еркін пікір алмасуларына өзіндік үлесімді қосып келемін. Одан бөлек, мектептегі ер балалардың тәрбиесіне де атсалысамын. Жалпы, ұстаздық жол оңай емес. Мұғалім болу үшін білім де, мінез де болу керек, – дейді ол.
Көпбалалы әке бос уақытын балаларымен өткізеді. Кішкентай ұлдарына ертегі оқып береді, жасы үлкен екі ұлына қамшы өруді үйретеді. Сенбі, жексенбі күндері балық аулауға да апарады. Одан бөлек, мектептегі танымдық-тәрбиелік шараларға да атсалысады. Қоғамдық бастамаларға өз үлесін қосып келеді.
– Осындай іс-шаралар аясында біз балаларға үлгі-өнеге көрсетіп қана қоймай, өзіміз де жан-жақты дамимыз. Жаңа технологияларды меңгеріп, ұлттық құндылықтарымызды насихаттаймыз. Қазір көп жерде асық ату, арқан тарту сияқты ұлттық ойындарымыз қалып барады. Ауыл баласы болмаса, қаланың баласы мұндай ойындарды ойнамайды. Біз қашан да жас ұрпаққа жақсы үлгі көрсетіп, елдің, жастардың болашағын ойлауға тиіспіз, – дейді ол.
