Қазақстан Республикасының Еңбек және халықты әлеуметтік қорғау министрлігі жүктілікке, босануға және бала күтіміне байланысты әлеуметтік төлемдерді алу кезінде кең көлемді заң бұзушылықтарды анықтады, деп хабарлайды turkystan.kz.
Ведомство деректеріне сәйкес, 2024 жылы 1,4 млн-нан астам азамат әлеуметтік тәуекелдің бес түрі бойынша Мемлекеттік әлеуметтік сақтандыру қорынан әлеуметтік төлем алған.
Жалпы төлем көлемі 958,3 млрд теңгені құрады, ал қорға түскен түсімдер 637,5 млрд теңгені ғана құрады. Қаржылық алшақтық рекордтық деңгейге – 320 млрд теңгеге жетті.
Қор шығыстарының ең үлкен бөлігі ана мен баланы қолдауға жұмсалды: жүктілікке, босануға және бала күтіміне байланысты төлемдер барлық шығындардың 82%-дан астамын құрап, шамамен 790 млрд теңгені құрады.
Еңбек министрлігі мұндай төлемдер алдын ала болжанатын әлеуметтік тәуекел түрлеріне жататынын атап өтті. Сондықтан жағдайды бақылауды күшейту және әрі қарайғы манипуляцияларды болдырмау үшін жүйелі шаралар қабылдау қажет.
