32 жастағы британдық Оливер Элвис екі жыл бойы ұйықтамағанын мәлімдеді. Оның айтуынша, бұл оның басына, көзі мен бұлшықеттеріне ауыр қысым түсіреді, сонымен қатар ас қорыту жүйесі мен қозғалыс үйлесімділігі бұзылған. Көзі көрмей қалатын шақтар да болған, кейде есінен танып, құлап кететін болған, деп хабарлайды turkystan.kz.
Элвис бұрын спортпен айналысып, зиян әдеттерден аулақ болған, ипотекасын төлеп, пойыз машинисі болып, пилот лицензиясын алған. Алайда денсаулығының нашарлауына байланысты ол жұмыстан кетуге мәжбүр болды. Үйін сатқаннан кейін 57 жастағы анасының үйіне көшкен ол, түскен қаржыны ем іздеуге жұмсап отыр.
Британдық дәрігерлер Элвистің жағдайын анықтау үшін 50-ге жуық маманға жүгінген. Оның диагноздары арасында посттравматикалық стресс, созылмалы шаршау, фибромиалгия, ұйқысыздық және шамадан тыс шаршау бар. Невролог Гай Лешзингер толық ұйықтамау адам үшін өмірге қауіп төндіруі мүмкін екенін ескертеді.
Simba компаниясы жүргізген зерттеу бойынша, күніне жеті сағаттан аз ұйықтайтын британдықтардың 15%-ы тырнақ сынғыштығына, 24%-ы терінің сезімталдығына, 16%-ы экземаға, 7%-ы псориазға шағымданады, ал 10%-ы терісінің күңгірт түске айналуынан алаңдайды.
Элвис жағдайының ерекше екеніне қарамастан, дәрігерлер «парадоксальды ұйқысыздық» — ұйықтамағандай сезінсе де, организм аз мөлшерде ұйықтай алады деген гипотезаны алға тартып отыр. Бұл жағдай психикалық бұзылыстармен қатар жүруі мүмкін, бірақ емдеу мүмкіндігі бар.
