Перизат Қайрат пен оның анасы Ғайни Алашбаеваға қатысты даулы қылмыстық іс бойынша сот отырысында прокурорлар алаяқтық, қылмыстық жолмен алынған кірістерді заңдастыру және азаматтардың сенімін теріс пайдалану фактілерін қамтитын айыптау актісін оқыды, деп хабарлайды turkystan.kz.
Тергеу материалдарына сәйкес, Перизат Қайрат пен Ғайни Алашбаева алдын ала сөз байласып, әрекет еткен. Айыптау нұсқасына сәйкес, 2021 жылдан 2024 жылға дейін олар халық пен заңды тұлғалардан қаражат жинап, жиналған қаражаттың көп бөлігін жеке қажеттіліктеріне жұмсаған.
Жалған қайырымдылық ұйымын құру
Перизат Қайрат Астанада тіркелген «Biz Birgemiz Qazaqstan 2030» қоғамдық бірлестігін құрған. Ол құрылтайшылардың қолтаңбаларын қолдан жасап, банктік шоттарды өз атына және анасының атына рәсімдеп, әлеуметтік желілерде белсенді жұмыс жүргізіп, қайырымдылыққа ақша жинаған. Кейін бұл қаражат қолма-қол ақшаға айналдырылып, қымбат заттар сатып алуға, саяхатқа және жылжымайтын мүлікке жұмсалған.
Балалар мен зардап шеккендерге көмек көрсету желеуімен қаражат жинау
Айыптау деректері бойынша, 2021 жылы Перизат Қайрат мүмкіндігі шектеулі балаларға арналған оңалту орталығын салу мақсатында қайырымдылық аукционын ұйымдастырған. Аукционнан 21,6 млн теңге жиналған, алайда айыптау материалдарында көрсетілгендей, бұл қаражаттың көп бөлігі мейрамхана жалдау, гүлдер, киім және жеке шығындарға жұмсалған.
2023 жылы ол Қазақстандағы Палестина елшілігімен Газа секторына гуманитарлық көмек жинау жөнінде келісім жасасқан. Алайда айыптау актісінде көрсетілгендей, жиналған 566 млн теңгенің тек 7,4 миллионы ғана мақсатты орынға жіберілген. Қалған қаражат Mercedes-Benz EQE автокөлігін, Sensata Plaza тұрғын үй кешенінен пәтер және басқа да жеке қажеттіліктерді сатып алуға жұмсалған.
2024 жылғы су тасқыны
2024 жылдың наурыз айында Қазақстанда су тасқыны басталғаннан кейін халықтың эмоциялық күйін пайдаланып, тағы да қаражат жинау бастамасын көтерген. Жалпы сомасы 2,86 млрд теңге жиналған. Бұл қаржы бренд киімдер, зергерлік бұйымдар, көліктер (соның ішінде Lexus пен Mercedes-Benz S 450), пәтерлер мен коттедждер сатып алуға, жөндеу жұмыстарына және шетелдік сапарларға жұмсалған.
Қылмыстық жолмен алынған кірістерді заңдастыру
Прокурор мәліметтері бойынша, Қайрат пен Алашбаева 1 млрд теңгеден астам қаражатты заңды айналымға енгізіп, мүліктің бір бөлігін туыстары мен жалған тұлғалардың атына рәсімдеген. Олардың ішінде 23 млн теңгеге сатып алынған «Rebel Flowers» гүл бизнесі де бар, ол кейін табыс көзіне айналған.
Айыптау тарабы жария еткендей, Перизат Қайрат пен Ғайни Алашбаеваға Қазақстан Республикасы Қылмыстық кодексінің 190-бабы 4-бөлігі 2-тармағы (ірі көлемдегі алаяқтық, адамдар тобы жасаған) және 218-бабы 3-бөлігі 3-тармағы (қылмыстық жолмен алынған ақшалай қаражатты заңдастыру) бойынша қылмыстық құқық бұзушылық жасады деген айып тағылып отыр.
Бұл іс бойынша сот отырысы жалғасуда.
