Соңғы жылдары дүкен сөрелерінен жиі көзге түсетін, ас мәзірімізге ене бастаған экзотикалық жемістің бірі – авокадо. Көпшілігі оны "суперфуд" деп атайды. Себебі құрамында денсаулыққа пайдалы көптеген зат бар. Дегенмен, кез келген өнім сияқты, оның да пайдасы мен зияны қатар жүруі мүмкін.
Авокадоның пайдасы
- Жүрекке пайдалы. Авокадо құрамында омега-3 және моноқанықпаған май қышқылдары мол. Бұл – жүрек-қантамыр жүйесінің жұмысын жақсартып, "жаман" холестеринді азайтып, "жақсы" холестеринді арттырады.
- Иммунитетті күшейтеді. Авокадо С, Е және В дәрумендеріне, сондай-ақ мырыш, магний, калий сияқты микроэлементтерге бай. Бұл заттар ағзаны ауруларға қарсы тұра алатын күшпен қамтамасыз етеді.
- Ас қорытуды жақсартады. Құрамындағы табиғи талшықтар (клетчатка) ішек жұмысын реттейді, іш қатудың алдын алады.
- Теріні жасартуға көмектеседі. Авокадоны сырттай маска ретінде қолдануға да болады. Ал ішіп-жеген жағдайда антиоксиданттар мен Е дәрумені теріні жұмсартып, қартаю процесін баяулатады.
- Қандағы қант деңгейін тұрақтандырады. Авокадо гликемиялық индексі төмен өнім болғандықтан, қант диабетімен ауыратындарға да ұсынылады. Ол қандағы глюкозаның күрт көтерілуіне жол бермейді.
Авокадоның зияны
- Калориясы жоғары. Авокадо пайдалы болғанымен, өте калориялы өнім екенін ескеру қажет. 100 грамм авокадоның құрамында шамамен 160–180 ккал болады. Артық тұтыну салмақ қосуға себеп болуы мүмкін.
- Аллергиялық реакция туғызуы мүмкін. Кей адамдарда авокадо аллергия шақыруы мүмкін – әсіресе латекске аллергиясы бар адамдарда. Бұл жағдайда қышу, бөртпе немесе тыныс алудың қиындауы байқалуы мүмкін.
- Кейбір дәрілер кері әсер беруі мүмкін. Авокадо қан сұйылтатын дәрілермен (мысалы, варфарин) қатар қабылданса, олардың әсерін өзгертіп жіберуі ықтимал. Сондықтан созылмалы аурумен ауыратын адамдар дәрігерімен кеңескені жөн.
Қалай және қанша мөлшерде жеу керек?
Авокадоны күніне жарты немесе бір дана жеген жеткілікті. Оны салаттарға қосуға, тостқа жағуға, смузи жасауға немесе жай ғана тұз, лимон қосып жеуге болады.
