Сот шешіміне сәйкес, әйел қылмыс жасаған кезде есі дұрыс емес деп танылды. Осыған байланысты ол қылмыстық жауапкершіліктен босатылды, деп хабарлайды turkystan.kz.
Ақтөбеде 29 жастағы әйел өз кәмелетке толмаған балалары — ұлы мен қызын тұншықтырып өлтірді деп айыпталған болатын (Қылмыстық кодекстің 99-бабының 3-бөлігі — екі немесе одан да көп адамды өлтіру).
«1996 жылы туған айыпталушы Қылмыстық кодекстің 99-бабының 3-бөлігі бойынша айыпталған. Ол Қылмыстық кодекстің 519 және 522-баптарына сәйкес қылмыстық жауапкершіліктен босатылады», — деп оқыды үкімді судья Нұрлан Бақтығалиев.
Қайғылы оқиға 2025 жылдың наурызында Ақтөбе облысының Қандыағаш қаласында болды. Жас әйел үш жасар ұлын және он бір айлық қызын жастықпен тұншықтырып өлтірген.
Сот процесі барысында сот-психиатриялық сараптама жүргізілді. Мамандар айыпталушыға суицидтік бағыттағы параноидты шизофрения диагнозын қойды. Сараптама қорытындысы бойынша, әйел психикалық ауытқушылықтан зардап шегеді, бұл оның өз әрекеттерінің нақты мәнін және қоғамдық қауіптілігін түсіну қабілетін жоққа шығарады.
Сот әйелді арнайы медициналық мекемеге мәжбүрлеп емдеуге жіберу туралы шешім қабылдады.
Еске сала кетейік, бұған дейін айыпталушы сот отырысына қатыспағаны хабарланған болатын. Ол арнайы психиатриялық орталықта ем қабылдап жатыр. Сот отырысына тек мемлекеттік айыптаушы, қорғаушы және жәбірленуші — әйелдің күйеуі қатысты.
Ол сотта екінші баласы дүниеге келгеннен кейін жұбайының психикалық ауытқушылық белгілері пайда болғанын айтты.
«Наурыз айында ол кіші қызымды тұншықтырғысы келетінін айтты. Мен полиция шақырдым, сараптама жүргізілді – "екінші дәрежелі психоз" диагнозы қойылды. Ал 13 наурызда ол баланы өлтіруге әрекеттенді. 102-ге қоңырау шалып, мылтық сұрады. Сол кезде тағы да полиция, қамқоршылық және медицина қызметкерлері келді. Осыдан кейін мен әйелімнің әкесіне қоңырау шалып, ол қызын Сағыз ауылынан Қандыағашқа алып кетті», – деді күйеуі.
Он күн өткен соң, анасы екі баласын да тұншықтырып өлтірген.
