Еcірткі тасымалдаушылар арасында жастар көбейген

Осы аптада есірткінің ірі партиялық кө­лемі СҚО-да анықталды. 

ІІМ кинологиялық бөлімі қызметкерлері «Заң және Тәртіп» қағидаты аясында еліміздің барлық аумағында есірткі тасымалдаушыларды анықтау бойынша жедел-профилактикалық және рейдтік іс-шараларды жүргізуді қолға алды. 

Осы аптада есірткінің ірі партиялық кө­лемі СҚО-да анықталды. 
– Солтүстік Қазақстан облысының жүр­гізушісі күдік туғызған автокөлік тоқ­татылды. Лақап аты Виола қызметтік-із­дес­тіру иті көлікті тексеру барысында сал­мағы 30 грамнан асатын мефедрон есірт­кі затын тапты. Ұсталған адам есірткі тара­тушы екені анықталды. 
Тағы бір оқиға республикалық маңызы бар Алматы – Астана автожолында тіркелді. Полиция қызметкерлері тексеру бары­сын­да көліктен 11 келіден асатын гашиш тәр­кі­леген. Ал есірткіні анықтаған – Тея қыз­мет­тік иті, – дейді ІІМ есірткі қылмысына қар­сы іс-қимыл комитетінің кинологиялық қызмет басқармасының бастығы Алмас Күнтуов. 
Қызметтік-іздестіру иттерінің жұмыс нәтижелері ауыз толтырып айтуға тұрар­лық­тай. 2025 жылдың екі айында ғана олар­дың көмегімен 100-ден астам оқиға анық­талған, 600 келіден астам есірт­кі, оның ішінде 48 келі синтетикалық есірткі  тәр­кіленді. ІІМ-нің кинологиялық бөлімі аза­маттардың қауіпсіздігін қамтамасыз ете оты­рып, есірткі қылмысына қарсы күрес бойын­ша жұмысты жалғастыруда.
Естеріңізге сала кетсек, былтыр желтоқ­сан­да Қазақстан Республикасының Пре­зи­денті есірткі құралдарының заңсыз айна­лы­мына қарсы іс-қимылға қатысты бір­қа­тар заңнамалық актіге өзгерістер мен толық­тырулар енгізу туралы заңға қол қой­ған болатын. Қабылданған түзетулер қыл­мыстық жауапкершілік жүйесін жақ­сар­туға және қылмыстық құқық бұзушы­лық­тың сипатына қарай жазаларды сара­лауға бағытталған. 
Статистикаға сүйенсек, 2024 жылы есірткі ісі бойынша 297-баптың 3-бөлігі бойын­ша 938 адам сотталған. Кейінгі бес жыл­да сотталғандар саны үш есе артқан. Олар­дың басым көпшілігі 10 жылдан 
15 жыл­ға дейінгі мерзімге бас еркіндігінен айы­рылды. Ал есірткі өндіргендерге бері­ле­тін 15-20 жыл түрме жазасы өмір бойына бас еркіндігінен айыру жазасына ауысты­рыл­ды.
Мамандар елде есірткі тасығаны үшін сотталғандар саны қалай көбейсе, солай жа­сарып жатқанын да айтып дабыл қағуда.  Мы­салы, былтыр есірткіге қатысты қылмыс жа­сап сотталғандардың тең жартысы – 16 мен 29 жас аралығындағы жастар болған. Бес жыл бұрын есірткімен сотталғандар ара­сында жастардың үлесі 30 пайыз еді. 2020 жылы есірткі сақтау, тасумен бай­ла­нысты 297-баппен 5 бала сотталған. 2024 жылы кәмелетке толмаған 31 бала түрме жазасын алған.