«Мектепті террористер басып алды»: Қостанайда оқушы жалған хабар берген
Процессуалдық шешім қабылданғаннан кейін ата-анасы жауапкершілікке тартылады.
Қостанайдағы мектептердің бірінде оқитын оқушы 4 наурызда құзырлы мекемеге қоңырау соғып, «мектепті террористер басып алды» деген ақпарат берген, деп хабарлайды turkystan.kz.
Оқиға орнына полиция, құтқарушылар, ҰҚК қызметкерлері барды. Мамандар оқу орнының аумағын тексерді. Алайда қауіп расталмады, сондай-ақ жарылғыш заттар мен күдікті адамдар табылмады.
Полицейлер дереу қоңырау соққан оқушыны анықтады. Ол сол мектептің 5-сынып оқушысы болып шықты.
Үрей тудырған әзіл оның отбасы үшін ауыр зардаптарға әкелді.
Қазіргі уақытта көрінеу жалған хабарлау фактісі бойынша сотқа дейінгі тергеу басталды. Процессуалдық шешім қабылданғаннан кейін ата-анасы жауапкершілікке тартылады.
Полиция терроризм актісі туралы көрінеу жалған хабарлағаны үшін бес мың айлық есептік көрсеткішке дейінгі мөлшерде айыппұл (бүгінгі күні – 19,6 млн.теңге) не сол мөлшерде түзеу жұмыстарымен, сондай-ақ бес жылға дейінгі мерзімге шектеу немесе бас бостандығынан айыру түрінде жаза көзделгенін еске салды.
Бұл қылмыс үшін 14 жасқа толған адамдар қылмыстық жауапкершілікке тартылады, сондықтан оны мектеп оқушылары да есте ұстауы керек. Сонымен қатар сот шешімі негізінде шығындар мен осындай хабарламадан келтірілген барлық залал өтелу қажет. Егер мұндай әрекеттерді кәмелетке толмағандар жасаған жағдайда, залалды өтеу олардың ата-аналарына немесе заңды өкілдеріне жүктеледі.
