«Оскар» сыйлығының 2025 жылғы жеңімпаздары анықталды
Биылғы «Оскар» әртүрлі жанрлар мен жаңа есімдерге толы болды.
2 наурызда Лос-Анджелесте "Оскар" сыйлығының марапаттау рәсімі өтті. Биылғы «Оскар» әртүрлі жанрлар мен жаңа есімдерге толы болды.
2025 жылғы «Оскардың» басты жеңімпазы – «Анора» фильмі. Режиссер Шон Бейкердің бұл картинасы бірден 5 номинация бойынша жеңіске жетті.
Осылайша, мына туындылар мен әртістер сыйлықтың негізгі лауреаттары атанды:
- Үздік фильм: «Анора»
- Үздік режиссер: Шон Бейкер, «Анора»
- Үздік актриса: Майки Мэдисон, «Анора»
- Үздік актер: Эдриен Броуди, «Бруталист»
- Екінші пландағы үздік актриса: Зои Салдана, «Эмилия Перес»
- Екінші пландағы үздік актер: Киран Калкин, «Нағыз қайғы»
«Анора» үздік фильм, режиссер, актриса, түпнұсқа сценарий және монтаж номинацияларында топ жарды. Бұл картина сыншылар тарапынан жоғары бағаланып, көрермендердің де ықыласына бөленді.
«Бруталист» фильмі үш жүлдеге ие болды, оның ішінде Эдриен Броуди үздік актер номинациясында жеңіске жетті. Оның әсерлі алғыс сөзі марапаттау рәсімінің ерекше сәттерінің бірі болды.
Зои Салдана «Эмилия Перес» фильміндегі рөлі үшін екінші пландағы үздік актриса атағын иеленді. Бұл картина жалпы 13 номинацияға ұсынылып, екі жүлдені жеңіп алды.
Киран Калкин «Нағыз қайғы» фильміндегі рөлі үшін екінші пландағы үздік актер атанды.
Үздік анимациялық фильм атағын «Ағын» туындысы, Үздік халықаралық фильм номинациясын «Мен әлі де осындамын» (Бразилия) картинасы жеңіп алды. Ал Үздік костюм дизайны Пол Тазуэллге («Зұлым») бұйырды. Ол бұл фильміндегі жұмысы үшін үздік костюм дизайны номинациясында жеңіске жетіп, бұл категорияда марапат алған алғашқы қара нәсілді ер адам атанды.
