Сұмдыққа айналған "мінсіз" ұсыныс: Ресейдің IT маманы Мьянмада 6 ай құлдықта болған
Ресейдің IT маманы Мьянмада 6 ай құлдықта болған. Бұл туралы Газета.ru жазды.
IT маманы өте тиімді жұмыс ұсынысын қабылдап, Мьянмаға көшкеннен кейін 6 ай құлдықта өмір сүрген. Жаңа жұмыс пен шетелге көшу туралы уәделер арбау ғана болып шықты.
Мьянмаға келген бойда оның төлқұжатын тартып алып, күнделікті 20 сағат бойы колл-орталықта жұмыс істеуге мәжбүрлеген. Оның басты міндеті – адамдарды алдап, ақшаларын тартып алу болған. Жалақы орнына тек тамақ беріп, қоқан-лоққы көрсетіп отырған.
Бостандыққа шығу тек Шри-Ланкадан келген басқа тұтқындардың көмегімен мүмкін болды. Олар бірге көтеріліс ұйымдастырып, қашып шыққан. Ақыры, олар Таиланд шекарасынан өтіп, Бангкокқа жеткен. Қазіргі уақытта IT-маман Таиланд астанасында, Ресейге оралуын күтіп отыр.
Мұндай жағдайлар әсіресе Оңтүстік-Шығыс Азия елдерінде жиі кездеседі. Алаяқтар жоғары жалақы мен жақсы жұмыс жағдайын уәде етіп, кейін адамдарды заңсыз жолмен жұмыс істеуге мәжбүрлейді.
Бұл оқиға – шетелде жұмыс ұсынатын компаниялармен келісім жасамас бұрын барынша мұқият болу керектігінің айқын мысалы. Жеке құжаттарды ешкімге бермеу және ұсыныстардың заңдылығын алдын ала тексеру – қауіпсіздік үшін маңызды қадам.
