Шетелдік бала күтушіге жала жапқан келіншек сотталды
Қазақстандық келіншек Филиппин азаматшасын бала күтуші ретінде жұмысқа алған.
Филиппин Республикасының азаматшасы Б. жеке кәсіпкер М.-ға қатысты ар-намысын, қадір-қасиетін және іскерлік беделін қорғау, сонымен қатар моральдық зиянды өндіру туралы талап-арызбен сотқа жүгінген.
Тараптар арасында бала күтушісі қызметін көрсетуге шарт жасалған.
2024 жылдың ақпан айында жауапкер Instagram әлеуметтік желісінде талапкердің төлқұжатын пайдаланып: «Еңбек міндеттерін орындамай, алаяқтықпен қашып кеткен жұмыскер. Өте сақ болыңыз!», - деп жазба жариялаған.
Бірақ сотта жауапкер өзі жариялаған ақпараттың шындық екенін дәлелдей алмаған.
Сот жарияланған ақпарат талапкердің ар-намысы мен қадір-қасиетіне нұқсан келтіреді деп танып, жауапкерді ол ақпаратты жоққа шығаруға міндеттеді.
Сондай-ақ оған моральдық шығын ретінде 100 мың теңге айыппұл салынды.
Үкім заңды күшіне енді.
