Автобус және такси жүргізушілері медициналық куәландырудан онлайн өте алады

16 қазаннан бастап еліміздегі қоғамдық көлік жүргізушілері медициналық куәландырудан онлайн форматта өте алады, деп хабарлады turkystan.kz.

Жолаушылар мен багажды тасымалдау қағидаларына тиісті толықтырулар енгізіліп, жүргізушілер рейс алдында және одан кейін медициналық куәландырудан онлайн режимде өте алады.

«Қабылданған нормаға сәйкес, жүргізушілерді онлайн форматта тексеру заңнаманың талаптарына жауап беретін және жүргізушінің жалпы денсаулығын тексеруге қабілетті автоматтандырылған медициналық кешендердің болуын және оларды пайдалануды көздейді. Атап айтқанда, жүргізушіні биометриялық және (немесе) басқа әдіспен сәйкестендіру, онлайн сауалнама өту, көз қарашығының жарық тітіркендіргішіне реакциясын тексеру, алкогольдік масаңдықты тексеру, дене температурасын, қан қысымын және пульсті өлшеу», – делінген хабарламада.

Осы салада цифрлық шешімдерді енгізу тасымалдаушыларға, таксопарктер мен автобус парктеріне:

- тексеру жүргізу рәсімдерінде ашықтықты қамтамасыз етуге;

- жүргізушілер мен медицина қызметкерлері арасындағы сыбайлас жемқорлық фактілерін азайтуға;

- жолаушылар мен багажды тасымалдау кезінде қауіпсіздік шараларын арттыруға;

- уақытты үнемдеуге;

- жүргізушілердің денсаулық жағдайына толық талдау жүргізуге мүмкіндік береді.