617
Жаңғырған дәстүр, жаңарған ел
Жаңғырған дәстүр, жаңарған ел
Биыл Ұлыстың ұлы күнін халық бетпердесіз, бейқам көңілмен қарсы алды. Ел бойынша Наурыз мейрамы кеңінен тойланды. Бұл – індеттен кейінгі елдің алғаш рет жиналып, көңіл серпілтуі, содан да болар, халықтың мерекені сағынысып, арқа-жарқа болғаны байқалды.
Әз-Наурыз ерекше тойланды
Мейрамды алматылықтар 21 наурыздан бастап тойлатты. Алматы қаласына жұмыс сапарымен келген Президент «Астана» алаңында өтіп жатқан мерекелік іс-шараға арнайы барды. Қасым-Жомарт Тоқаев Қазақстан халқын Ұлыстың ұлы күнімен құттықтап, Наурыздың ежелден жақсылық пен жасампаздықты дәріптейтін мереке екенін атап өтті.
– Әз-Наурыз – береке-бірліктің, шынайы жанашырлықтың және өзара қамқорлықтың мейрамы. Мен бүгін Ұлыс күнін өздеріңізбен бірге қарсы алу үшін Алматы қаласына арнайы келдім. Алматы – Тәуелсіздігіміздің алтын бесігі. Халқымызға қайта оралған Ұлыс тойын мерекелеу осы қастерлі мекеннен басталған. Алматы – қазақ елінің рухани, мәдени және іскерлік орталығы, – деді Мемлекет басшысы.
Президент зиялы қауымның және өнер, білім, ғылым, бизнес салалары өкілдерінің Алматы шаһарында шоғырланғанына тоқталып, қаңтар оқиғасы кезінде қала тұрғындарының зор қауіп-қатерге төтеп бергеніне ерекше мән берді.
– Сын сағатта тұрғындар нағыз отаншылдықтың үлгісін көрсетті. Біз ауызбіршіліктің арқасында мемлекетімізді сақтап қалдық. Мен шаһарды қалпына келтіру үшін құзырлы органдарға нақты тапсырмалар бердім. Алматыны өркендету және жергілікті жұрттың тұрмыс сапасын жақсарту менің айрықша назарымда. Қазір біздің алдымызда зор міндеттер мен ауқымды жұмыстар тұр. Оны жүзеге асыруға алматылықтар барынша атсалысады деп сенемін, – деді Қасым-Жомарт Тоқаев.
Мемлекет басшысы дамудың жаңа кезеңіне қадам басқанымызға тоқталып, өзінің халыққа Жолдауында айтылған көлемді реформалар елімізді түбегейлі жаңғыртуға бағытталғанын атап өтті.
Президент бүгінгі мерекелік күннің жаңа өзгерістерге бастауына, тұғыры мығым, бірлігі бекем еліміздің жасай беруіне тілектестік білдірді. Қасым-Жомарт Тоқаев құттықтау сөзінен кейін жиналған жұртшылықпен бірге мерекелік концертті тамашалады.
Ал 22 наурыз күні елорданың 20-дан астам алаңында Наурыз мейрамы тойланды. Ауа райының қолайсыздығына қарамастан қала тұрғындары отбасымен алаңға келіп, күн мен түннің теңелген көктемнің басты мерекесін атап өтті.
Сондай-ақ елорда тұрғындарын Наурыз мерекесімен қала әкімі Алтай Көлгінов құттықтады.
«Қала тұрғындары бұл мерекені ылғи да ерекше ықыласпен күтеді, сол сияқты жұрттың бір-біріне көмек қолын созуы отбасылық және мәдени құндылықтардың, халық бірлігінің жарқын көрінісі болатынын айтты. Мереке күндері біз әлеуметтік аз қамтылған азаматтарға азық-түлік себеттерін тарату акциясын тоқтаусыз жалғастырамыз. Қалада Наурыз мейрамы атап өтілетін 20-дан астам орын, сол сияқты елді мекендерде де орындар анықталды», – деп атап өтті әкім.
Басты мәдени-спорттық іс-шаралар «Қазақ елі» алаңында, «Жастар» саябағында, Жазушылар аллеясында, «Ататүрік», «Көктал» саябақтарында, ЭКСПО және Demalys Promenade алаңдарында ұйымдастырылды. Бұдан басқа, Наурыз мейрамына орай ұйымдастырылған орындар қаланың барлық елді мекенінде өткізіледі.
«Бүгін Ұлттық мереке – Наурыз мейрамына орай іс-шаралар өткізілуде. Байқоңыр ауданы бойынша мерекелік іс-шаралар 5 орында – «Ататүрік» саябағында, Жазушылар аллеясында және үш елді мекенде өткізіледі. Мереке күні саябақта киіз үйлер тігіліп, концерттік бағдарлама ұйымдастырылып, ұлттық спорт түрлерінен жарыстар өткізіледі. Әр киіз үйде театрландырылған қойылымдарды тамашалауға болады, таңертең қонақтарға наурызкөже мен палау таратылды», – деді Байқоңыр ауданы әкімінің орынбасары Шұғыла Құдайбергенова.
Қала бойынша белгіленген орындардың бәрінде алтыбақан, ұлттық нақышта безендірілген киіз үйлер орнатылып, дәстүрлі тағамдар – бауырсақ пен наурызкөже келген жұртқа таратылды.
Дәстүр бойынша ұлттық спорт түрлерінен жарыстар да өткізілді. Тілек білдірушілер асық ату, қол күресі, арқан тарту, гір көтеру және т.б. бойынша сынға түсті.
Мереке аясында қалада игі істерге арналған акциялар ұйымдастырылып, мұқтаж жандарға азық-түлік себеттері таратылады.
Атырау қаласының шағынаудандарында да Наурыз мерекесіне арналған бірнеше іс-шара өтті. Махамбет атындағы академиялық қазақ драма театры алдында өткен іс-шараға облыс әкімі Махамбет Досмұхамбетов қатысып, тұрғындарды мерекемен құттықтады.
– Наурыз мерекесі адамдарды ұлт пен дінге, діл мен тілге бөлмей, керісінше қайырымдылық, ізгілік және мейірім сынды ізгі қасиеттерге біріктіреді. Осыдан болар, аталған құндылықтарды қанына сіңірген қазақ ұлты үшін бұл күн ерекше әспеттеледі. Бабаларымыз Ұлыстын ұлы күнінде бір-біріне деген өкпе-ренішті ұмытып, бір-біріне жақсылық тілеген. Қыстан қымтырылып шыққан әлсіздердің шаруасына көмектесіп, бұлақ көздерін ашып, тал егіп, игілікті істер істеген. Күн мен түн теңесіп, байтақ дала көктем шуағымен нұрланатын Наурыз – жыл басы, жақсылықтың бастауы. Құт-берекенің арқауы – Наурыз әр шаңыраққа молшылық сыйласын! Еліміз өркендей берсін! – деді Махамбет Досмұхамбетов.
Мерекелік іс-шарада 100-ден астам балаға «Наурыз-қоржын» сыйлығы берілді. Балалар анимациялық қойылымдарды тамашалады.
Өскемен тұрғындары да Ұлыстың ұлы күнін кең көлемде атап өтті. Орталық алаңға жиналған жұртшылыққа ұлттық тағамдар ұсынылып, кинотеатрларда отандық фильмдер тегін көрсетілді. Шаһар жұртшылығы мен жастары мерекеге орай «Эко Наурыз» акциясын өткізіп, Шешек асуы маңындағы бұлақты қоқыстан тазартты. Мереке күні бас алаңда киіз үй қалашығы, балалар ойын алаңдары мен халық шеберлерінің сәндік-қолданбалы өнер көрмесі ұйымдастырылды. Ал жәрмеңкеде Өскемен тұрғындары әртүрлі дәмді тағамдардан дәм татып, сауда көркін қыздырды.
Қызылорда жұртшылығы Наурыз мерекесін сән-салтанатымен қарсы алды. Орталық алаңда ақшаңқан 18 киіз үй тігіліп, ұлттық салт-дәстүрді дәріптейтін іс-шаралар, спорт түрлерінен жарыстар ұйымдастырылды.
Ал Шымкентте мереке тоғыз күн бойы тойланды. Биыл Шымкентте наурызнама дәстүрі заманауи үлгіде жаңартылып, тоғыз күн түрлі атаумен мерекеленіп жатыр. Әр күн өзіндік сипаты, өзіндік ерекшеліктермен ұйымдастырылуда. Сондай-ақ, «Ұлттық тағамдар», Nauryz Fashion Day және «Гастроном Fest» фестивалі өтті. Бүгін, Ұлыстың ұлы күніне орай, үшінші мегаполисте 10 жерде мерекелік бағдарламалар өтіп, тұрғындар мен қала қонақтарына көтеріңкі көңіл күй сыйлады.
Семей халқы да наурыз мейрамын ерекше тойлады. Жиналған қауымға мерекелік концерт қойылды. Алаңдарда спорттық сайыстар да өтіп, сәндік-қолданбалы өнер жәрмеңкесі ұйымдастырылған. Жалпы ШҚО-да Наурызға орай 300-ден астам іс-шара өтті.
Қостанай облысында Наурыз мейрамы қарсаңында 317 аз қамтылған отбасына азық-түлік жиынтығы тапсырылған.
Мерекелік марапат
Наурыз мерекесі қарсаңында Қазақстан Президентінің Жарлығымен елдің әлеуметтік-экономикалық және мәдени дамуына қосқан елеулі үлесі, белсенді қоғамдық қызметі, азаматтарды қорғауда және құтқаруда көрсеткен жеке жанқиярлығы, қоғамдық тәртіпті қамтамасыз етуге көрсеткен көмегі үшін еліміздің бір топ азаматы мемлекеттік наградалармен марапатталды. Олардың қатарында өндіріс, денсаулық сақтау салаларының қызметкерлері, бизнес өкілдері, мәдениет және ғылым қайраткерлері, спортшылар, волонтерлер бар.
Мемлекет басшысының айтуынша, бүгінде әрбір отандасымыз егемен елімізді өркендетуге өз үлесін қосуда. Халқымыз қашанда береке-бірлікке, ырыс-ынтымаққа баса мән берген, өзара жанашырлық пен қамқорлықты барынша дәріптеген.
– Ел ішінде бейбіт күнде еңбегімен, қиын сәтте ерлігімен көзге түскен жандар аз емес. Кешегі дүрбелең кезінде қаншама азаматымыз жұртты сабырға шақырып, салиқалы сөз айтты. Олар өз басын қатерге тігіп, айналасындағы адамдарға көмектесті. Жауапты сәтте жұртына қорған болып, елдіктің нағыз үлгісін көрсетті. Осындай отаншыл тұлғаларымыз – жас ұрпаққа өнеге. Халқымыз «Ер – еңбегімен қадірлі» деп бекер айтпаған. Елге еңбегі сіңген жандарға Ұлыстың ұлы күнінде құрмет көрсетудің зор символдық мәні бар, – деді Президент.
Қасым-Жомарт Тоқаев сөзін қорытындылай келе, Наурыз мерекесі қарсаңында бір топ қайраткерге мемлекеттік награда тапсыру жөнінде шешім қабылдағанын жеткізді. Сондай-ақ бұл іс-шараны осы мейрамға орай өткізу игі дәстүрге айналатынын айтты.
«Қазақстанның Еңбек Ері» атағы Қазақстан Республикасының әлеуметтік-гуманитарлық дамуындағы аса үздік жетістіктері үшін жазушы Илья Жақановқа, еліміздің денсаулық сақтау саласын дамытудағы аса үздік жетістіктері үшін Қазақ тағамтану академиясының президенті Төрегелді Шармановқа берілді.
«Отан» орденімен ақын Светқали Нұржан, І дәрежелі «Барыс» орденімен Л.Гумилев атындағы Еуразия ұлттық университетінің профессоры Жандарбек Мәлібекұлы, ақын Нұрлан Оразалин, ІІІ дәрежелі «Барыс» орденімен Алматы облысы Ардагерлер кеңесінің төрағасы Ермек Келемсейіт, Алматы қаласы Қазақстан халқы Ассамблеясы Қоғамдық келісім кеңесінің төрағасы Ахметжан Шардинов, Күрес федерациясының президенті Дәулет Тұрлыханов, әл-Фараби атындағы Қазақ ұлттық университетінің ректоры Жансейіт Түймебаев, Л.Гумилев атындағы Еуразия ұлттық университетінің проректоры Дихан Қамзабекұлы, Алматы облысы әкімінің бірінші орынбасары Ләззат Тұрлашов және басқалар наградталды.
«Парасат» орденімен мәдениет, ғылым және білім қайраткерлері, бұқаралық ақпарат құралдарының өкілдері марапатталды. Олардың қатарында Ұлттық ғылым академиясының мүшесі Кәрімбек Құрманәлиев, М.Қозыбаев атындағы Солтүстік Қазақстан университетінің аға оқытушысы Павел Афанасьев, Парламент Мәжілісінің депутаттары Берік Әбдіғалиұлы, Еділ Жаңбыршин бар.
Спортты дамыту дирекциясы пауэрлифтинг командасының жетекшісі Сергей Цырульников ІІ дәрежелі «Достық» орденімен марапатталды.
«Құрмет» орденімен саясаттанушы Данияр Әшімбаев, Қолданбалы этносаяси зерттеулер институтының директоры Талғат Қалиев, Адам құқықтары үшін хартияның атқарушы директоры Жеміс Тұрмағамбетова, Тараз қалалық көпбейінді ауруханасының бөлім меңгерушісі Ернар Еділбаев, белсенді Орынбасар Сейітов, «Мир Евразии» қорының президенті Эдуард Полетаев, Шымкент қаласы Ауған соғысы ардагерлері одағының төрағасы Ғалымжан Майханов, қоғам қайраткері Дәурен Тәліпов, жыршы Арғын Бисенов, Қ.Оспанов атындағы №1 балалар-жасөспірімдер спорт мектебінің басшысы Нұржан Ермағамбетов, Алматы қалалық №7 клиникалық ауруханасының бөлім меңгерушісі Есенай Еспенбетов наградталды. «Құрмет» орденіне жалпы 94 адам ие болды.
«Ерен еңбегі үшін» медалімен «Адырна» қорының президенті Арман Әубәкір, Павлодар облысы аумақтық кәсіподақтар бірлестігінің баспасөз хатшысы Константин Музалевский, Қазақ ұлттық өнер университетінің аға оқытушысы Ұларбек Нұрғалым марапатталды. Осы медальмен барлығы 25 адам наградталды. «Шапағат» медаліне 68 волонтер, меценат және басқа да азаматтар ие болды. Олардың қатарында журналист Александра Мыскина, «Үміт-Надежда» мүгедектер ұйымының төрағасы Дүйсенғали Оспанов, «Океан» ПИК жұмыскері Арлан Мүтішев, Paybox.money ЖШС департамент директоры Мария Чечина,
Р. Байсейітов атындағы Семей қаржы-эконо-микалық колледжінің студенті Мерейбек Мағабилов, «Богатырь-Көмір» ЖШС жол машиналарын реттеуші Евгений Шарифуллин, волонтер Айгерім Досқалиева бар.
Осылайша Ұлыстың ұлы күні еліміздің әр қаласында, әр аймағында, әр ауылында тойланды. Еңсесін тіктеген елдің тілеуі «Ұлыс оң болсын» деген бір тілекке тоғысты.
