351
Әулиекөл қалашығы қалпына келтіріледі
Әулиекөл қалашығы қалпына келтіріледі
Алтын орданың 750 жылдығын атап өту аясында Павлодар мемлекеттік педагогикалық институтына қарасты Margulan Centre орталығының жетекшісі археолог Тимур Смағұлов Әулиекөл қалашығында кесенелерді қалпына келтіру жұмыстарын жүргізеді.
«Жошы хан тұсында Алтын Орда дәуірінің негізгі орталығының бірі Ертіс өңірінде болды деген тұжырым бар. Ол Әулиекөл жағасында орналасқан және сол жерде ерекше сақталған қаланың қалдықтары бар. Осыған байланысты мәдениет басқармасы арқылы 20 млн теңге қаражат бөлініп отыр. Сол қаланың негізгі бейнесін қалпына келтіруге тырысамыз. Нәтижесінде сол жерде әулие Исабек Ишанның кесенесімен бірге туристік орталық, киелі орын пайда болады деген ойдамыз. Бұл археологиялық қазба жұмыстар бұрын да жүргізілген, бірақ биыл ғылыми тұрғыдан жүйелі түрде қаражат бөлініп, ұйымдастырылады», – дейді облыстық Мәдениет, тілдерді дамыту және архив істері басқармасының басшысы Ернұр Дәуенов.
Ведомство басшысының айтуынша, Әулиекөл қалашығын қалпына келтіру бойынша қазба жұмыстары маусым айында басталып, тамыз айының соңында аяқталады. Қыркүйекте қорытындысы шығарылып, қараша-қазан айларында халықаралық конференция ұйымдастырылады.
Алтын Орданың 750 жылдығын атап өтуге арналған облыстық жоспар бойынша қалалар мен аудандарда барлығы 100-ге жуық әртүрлі іс-шара өтеді. Олардың қатарында көрмелер, танымдық сағаттар және суреттер байқауы бар.
Айта кетерлігі, орта ғасырлық Әулиекөл қалашығы саяси-мәдени және әкімшілік-экономикалық орталық болған. Ел арасында бұл өңір Ақкөл-Жайылма деген атпен белгілі.