Мими рөліндегі Мария

«Астана Опера» театрының солисі Мария Мудряк Ресейдің әйгілі Үлкен театры сахнасында алғаш рет өнер көрсетті. Әртіс Джакомо Пуччинидің «Богема» операсының премьерасында Мими бас партиясын орындады. Мимидің ғашығы – Рудольфтың рөлін «ЭКСПО-2017» бағдарламасы аясында «Астана Опера» театрының сахнасында өткен Пласидо Домингоның «Опералия» халықаралық опера әншілерінің байқауында Мария Мудрякпен бірге лауреат атанған итальяндық тенор Давиде Джусти сомдады. Спектакльдің қоюшы-режиссері – Жан-Роман Весперини (Франция), қоюшы-дирижері – Эван Роджистер (АҚШ). Сценограф – Бруно де Лавенер.  Операны жасауға халықаралық команда атсалысты. Жаңа сахналық нұсқа автор – ұлы композитор Джакомо Пуччинидің 160 жылдығына орайластырылған.  «Мими партиясындағы Мария Мудряк – өткен опера маусымындағы жеке-дара үлкен құбылыс. Ғажап дауыс. Жігерлі, өте әдемі, терең тынысты дауыс әрі тап-таза дауыс ырғағын ақылмен бақылауға бағындырған. Сонымен бірге 24 жасар әнші қиялға бергісіз көркем де сұлу, бұл оның кейіпкеріне ерекше сүйкімділік пен кинематографиялық шыншылдық бере түседі», – деп жазды  «Московский комсомолец» басылымында сыншы әрі журналист Екатерина Кретова. Қазақстандық опера әншісінің орындаушылығына өнерсүйер қауым да дән ризашылығын білдірген.

Серіктес жаңалықтары