جاڭالىقتار

تۇركىستاندا ەگىلگەن تال

تاياۋدا قالامىزداعى مۇمكىندىگى شەكتەۋلى ازاماتتاردى توپتاستىرعان «شاپاعات» مۇگەدەكتەردىڭ قايىرىمدىلىق قورىنىڭ مۇشەلەرى «جاسىل جەلەك» كوگالداندىرۋ اكتسياسىن وتكىزدى. دانا حالقىمىزدىڭ «ءبىر تال كەسسەڭ، ون تال ەك» دەگەن ناقىلىن بويىنا سىڭىرگەن، رۋحتارى بيىك ازاماتتار ايماقتى كوگالداندىرۋ جۇمىستارىن جۇرگىزدى. جاراتقان بەرگەن ون ەكى مۇشە تۇگەل قىزمەت جاساماسا دا، كوبىنە سوقتالداي ازاماتتار اتقارا الماعان ىستەردى جاساپ جاتقان بۇل ازاماتتار «ۇرپاققا ونەگە، قوعامعا ۇلگى» دەسەك، ارتىق ايتقاندىق ەمەس. 

«ءوڭىرىمىزدى جاسىل جەلەككە اينالدىرايىق!» دەگەن ۇراندى تۋ ەتكەن يگى شاراعا قالا ازاماتتارى قولداۋ كورسەتىپ، قالانى كوگالداندىرۋ ماقساتىنداعى اكتسياسى جالپى قالالىق سيپات الدى. 

بۇگىنگى ءاربىر ىزگى ءىسىمىزدىڭ كەلەر ۇرپاققا ورنەك ەكەنىن جادىمىزدا ساقتاساق، ازاماتتىعىمىزعا سىن بولماس ەدى. تۇتاس تۇركىنىڭ اتاجۇرتى سانالاتىن كيەلى تۇركىستاننىڭ توپىراق سۋىرىپ تۇرعانى «تۇركىستاندىقپىن» دەگەن ءاربىر ازاماتقا سىن بولۋى ءتيىس. 

كوگالداندىرۋ اكتسياسىن ۇيىمداستىرۋشى، ساۋاپتى ءىستىڭ باسى-قاسىندا جۇرگەن قايىرىمدىلىق قوردىڭ پرەزيدەنتى ەركىن شالتان كەرىمبايۇلىن اڭگىمەگە تارتقان ەدىك. ول كىسى: «تابيعاتتى قورعاۋ، وعان قامقور بولىپ ايالاۋ بىزگە بابادان قالعان مۇرا، ۇرپاقتىق پارىزىمىز. «جاقسىلىقتىڭ ۇلكەن كىشىسى بولمايدى» دەيدى حالىق دانالىعى. قۇرى سەكەڭدەپ، بايانسىز ءجۇرىستىڭ قۇلى بولعانشا، ءبىر مەزگىل تال ەككەندى ءجون دەپ ساناپ، جاستاردى جاقسىلىققا جۇمىلدىرىپ جاتقان ءتۇرىمىز بۇل»،– دەپ جاۋاپ بەردى. 

ءوز سوزىندە ەركىن مىرزا: «ءىستىڭ باسى-قاسىندا جۇرگەنىم بولماسا، قولداۋ كورسەتكەن ازاماتتار بارشىلىق، ولارعا ايتار العىسىم زور. العاشقىدا تال كوشەتتەرىن ساتىپ الامىز دەپ جوسپارلاعانبىز، الايدا قالا اكىمى ب.اشىربەكوۆ ازاماتتىق تانىتىپ، جاس شىبىقتار الىپ بەردى. ايتا بەرسەك، كومەك قولىن سوزعان ازاماتتارىمىز جەتىپ ارتىلادى. اتىن اتاپ ءتىزىپ، ءتۇسىن تۇستەۋدى ولاردىڭ وزدەرى قالامايدى. جالپى ايتارىم، قۇدايعا ءتاۋبا، تۇركىستاندا الاشتىڭ قامىن ويلار ازاماتتارىمىز بار»، – دەگەندى ايتتى. 

ارقاشان الاشتىڭ ازاماتتارى امان بولعاي! ال ەلدى جۇمىلدىرىپ، ىنتىماققا ۇندەپ جۇرگەن «شاپاعات» مۇگەدەكتەردىڭ قايىرىمدىلىق قورىنىڭ مۇشەلەرىنە جاقسى تىلەكتەن باسقا ايتارىمىز جوق.

ارايلىم اۋباكىروۆا

تۇركىستان قالاسى

Back to top button