تاجىكستاندا شەتەلدە وقىعان ءدىن قىزمەتكەرلەرىن جۇمىستان شىعارا باستادى

تاجىكستاننىڭ ءدىن ىستەر جونىندەگى كوميتەتى شەتەلدە ءدىني ءبىلىم العان ءدىن قىزمەتكەرلەرىن جۇمىستان شىعارۋ تۋرالى شەشىم قابىلدادى. ايتا كەتەرلىك جايت، كوميتەت توراعاسىنىڭ سۋلايمون داۆلاتزودا مەن تاجىكستان ۇلەمدەر كەڭەسىنىڭ باسشىسى سايدمۋككارام ابدۋلكوديرزودا ءدىني بىلىمدەرىن شەتەلدەن العان.

سايدمۋكاررام ابدۋلكوديرزودا تاجىكستانداعى مۇسىلماندار تىنىشتىعى ءۇشىن قىزمەتىنەن كەز كەلگەن ۋاقىتتا كەتۋگە دايىن ەكەنىن مالىمدەدى. «تاجىكستاندا تىيىم سالىنعان اعىمدارعا قوسىلىپ كەتكەن بىرنەشە يمام-حاتيب ۇستالىپ، جازالاندى. مۇنداي باستاما ماعان بايلانىستى قابىلدانعان بولسا، وندا مەن ەل تىنىشتىعى ءۇشىن بۇل قىزمەتتەن كەتۋگە دايىنمىن. ويتكەنى مەن 1990-جىلدارداعى قايعىلى وقيعالاردىڭ قايتالانعانىن قالامايمىن»، – دەدى ول.

كوميتەتتىڭ ءباسپاسوز حاتشىسى افشين مۋكيمنىڭ حابارلاۋىنشا، مۇنداي شەشىم 28 قازاندا قابىلدانعان، وعان كوميتەت توراعاسىنىڭ ورىنباسارى امىربەك بەكنازاروۆ قول قويعان. «بۇل شەشىمنىڭ زاڭسىز ءبىلىم العان يمام-حاتيبتەرگە عانا قاتىسى بار»، – دەدى ول.

بۇعان دەيىن الەۋمەتتىك جەلىلەردە ءدىن كوميتەتىنىڭ ايماقتارداعى باسقارمالارىنا جولداعان تەلەفونوگرامماسىنىڭ كوشىرمەسى جاريالانعان ەدى. وندا كوميتەت شەتەلدە ءبىلىم العان يمام-حاتيبتەرگە قىزمەتتەن ءوز ەركىمەن كەتۋگە ەكى اپتا ۋاقىت بەرەتىنى ايتىلدى.

تەلەفونوگراممادا مۇنداي شەشىمنىڭ بۇعان دەيىن شەتەل مەدرەسەلەرىندە ءبىلىم العان بىرنەشە يمامنىڭ ەلدەگى قىلمىستارى اشكەرەلەنگەن سوڭ قابىلدانعانى ايتىلدى.

 

ۇقساس جاڭالىقتار

Back to top button