گامبۋرگتە جەلبىرەگەن كوك تۋ

 

2017 جىلدىڭ 25 تامىزىندا گەرمانيانىڭ گامبۋرگ قالاسىندا باستالعان بوكستان الەم چەمپيوناتى  3 قىركۇيەكتە ءوز مارەسىنە جەتتى. بۇل ءدۇبىرلى دوداعا  الەمنىڭ 85 ەلىنەن 280 بىلعارى قولعاپ شەبەرلەرى ايقاسقا تۇسكەن ەدى. قازاقستاننان 49 كەلى سالماقتا ەرجان جومارت، 52 كەلىدە ازامات يساقۇلوۆ، 56 كەلىدە قايرات ەراليەۆ، 60 كەلىدە ادىلەت قۇرمەتوۆ، 64 كەلىدە بەكداۋلەت يبراگيموۆ، 69 كەلىدە ابىلايحان ءجۇسىپوۆ، 75 كەلىدە ءابىلحان امانقۇل، 81 كەلىدە ەرىك ءالجانوۆ، 91 كەلىدە ۆاسيلي لەۆيت، اسا اۋىر سالماقتا قامشىبەك قوڭقاباەۆ شارشى الاڭعا شىعىپ، ءوز كۇشتەرىن سىناپ كوردى. ايتا كەتەتىن ءبىر جايت، قۇرامنىڭ سەكسەن پايىزى ەلىمىزدە الدىن الا وتكىزىلگەن ىرىكتەۋ جارىسىندا ءوز شەبەرلىكتەرىمەن تانىلىپ، توپ جارعان جاستار. العاشقى جارىس كۇنىندە،  وكىنىشكە قاراي، سۇرىنگەندەر دە، جەڭىسىمەن قۋانتىپ، جەكپە-جەك ايقاستى جالعاستىرعاندار دا بولدى.

جومارت ەرجان رەسەيلىك ۆاسيلي ەگوروۆتى ايقىن باسىمدىقپەن جەڭىپ، جارتىلاي فينالعا شىقتى. الايدا كۋبالىق بوكسشى، الەم چەمپيونى جوانيسوم ارگيلاگوعا ەسە جىبەرىپ الدى. قايرات ەراليەۆ تۋرنير يەسى، نەمىس بوكسشىسى ومار ەل-حاگامەن قولعاپ ءتۇيىستىرىپ، ونى سوققىنىڭ استىنا الىپ، جارىس جولىنان تايدىردى. ال كەزەكتى ايقاستا ەۋروپا چەمپيونى، بريتاندىق پيتەر ماكگرەيمەن شىعىپ، قارسىلاسىن تىزە بۇكتىرىپ، فينالدىق كەزدەسۋگە جولداما الدى. ول شەشۋشى جەكپە-جەكتە امەريكاندىق ديۋك رەگاندى شىڭدالعان شەبەرلىگىنىڭ ارقاسىندا ايقىن باسىمدىقپەن جەڭىپ، التىننان القا تاعىپ، چەمپيوندىق تۇعىرعا كوتەرىلدى. ابىلايحان ءجۇسىپوۆتىڭ يتالياندىق بوكسشىمەن جەكپە-جەگى وڭايعا سوققان جوق. اسا تارتىسپەن وتكەن سايىستا تورەشىلەر القاسى يتالياندىق شەبەردىڭ قولىن كوتەرگەن بولاتىن. الايدا ايبا وكىلدەرى بۇل شەشىمدى قاتە دەپ تاۋىپ، ولارعا ءتۇيىندى ماسەلەنى قايتا قاراتىپ، ءجۇسىپوۆتىڭ جەڭگەنىن حابارلاتتى. ابىلايحان جارتىلاي فينالدا ۆەنەسۋەلادان كەلگەن گابريەل ماەستر پەرەسپەن الاڭعا شىققان. پەرەس مەرزىمىنەن بۇرىن جەڭىسكە جەتۋدى كوزدەگەنى سوققىلارىنان كورىنىپ تۇردى. ءجۇسىپوۆتىڭ قاباعىنان قان ساۋلاپ اققاندا قازاق جانكۇيەرلەرى جەڭىستەن ۇمىتتەرىن ۇزگەن ەدى. بىراق ءبىزدىڭ جىگىت ەرلەدى. اۋىر سوققىلارىن قارداي بوراتىپ، قارسىلاسىنىڭ ويىن جۇزەگە اسىرۋىنا مۇمكىندىك بەرمەي 3:1 ەسەبىمەن جەڭىسكە جەتتى. دەگەنمەن جارتىلاي فينالدا وزبەكستاندىق شاحرام گياسوۆتان جەڭىلىپ، قولا مەدالعا يە بولدى. تارازدىق ءابىلحان امانقۇلوۆ كۋبانىڭ ايتۋلى بوكسشىسى، الەم جانە وليمپيادا چەمپيونى ارلەن لوپەسپەن شارشى الاڭدا قولعاپ ءتۇيىستىرىپ، جەڭىسكە دەگەن قۇلشىنىسىنىڭ ارقاسىندا ازۋلى قارسىلاسىنا كوپ سوققىلارىن دارىتىپ، باسىمدىعىن بايقاتىپ، بارشا جانكۇيەرلەرىن ءبىر سەرپىلتىپ تاستادى. ول جارتىلاي فينالدا ءازىربايجان وكىلى كامران شاحسۋۆارلىمەن كەزدەستى. بۇل قارسىلاسى ريو وليمپياداسىندا  لوپەستەن عانا جەڭىلىس تاپقان بولاتىن. ءابىلحان العاشقى راۋندتا-اق ءازىربايجان بوكسشىسىن سوققىنىڭ استىنا الىپ، كەزدەسۋ سوڭىندا جەڭىسكە جەتتى. ءابىلحان شارشى الاڭداعى شەشۋشى ايقاستا ەۋروپا بىرىنشىلىگىنىڭ چەمپيونى، ۋكرايندىق الەكساندر حيجنياكپەن قولعاپ  ءتۇيىستىردى. جۇرت ءابىلحاننىڭ جەڭىسكە، التىننان القا تاعاتىنىنا سەنىمدى ەدى. بىراق ايقاس ناتيجەسى جۇرت كۇتكەندەي بولمادى. جەڭىس تۇعىرىنا حيجنياك كوتەرىلدى. اۋىر سالماقتاعى جەرلەسىمىز ۆاسيلي العاشقى كەزدەسۋىندە اۆستراليالىق بوكسشى دجەيسون ءۋوتليدى 5:0 ەسەبىمەن تىزە بۇكتىردى. جارتىلاي فينالدا ءوزىنىڭ ەجەلگى قارسىلاسى كۋبالىق ەرسيلاندي ساۆونمەن شارشى الاڭعا شىقتى. ولار بۇدان بۇرىن بىرنەشە رەت قولعاپ تۇيىستىرگەن – بىردە جەڭىپ، بىردە جەڭىلىپ جۇرگەن سىرالعى قارسىلاستار ەدى. جۇرت لەۆيتتان ساۆوندى جەڭەتىنىنە، ريو وليمپياداسىندا تورەشىلەردىڭ جورتا بۇرۋىمەن جەڭىسكە جەتكەن قارسىلاسى رەسەيلىك ەۆگەني تيششەنكومەن قولعاپ  تۇيىستىرەتىنىنە  سەنگەن ەدى. وكىنىشكە قاراي، بۇل جولى لەۆيت كۋبالىققا ەسە جىبەرىپ، قولا مەدالدى قاناعات ەتتى. اسا اۋىر سالماقتاعى قامشىبەك قوڭقاباەۆ تا وسى بىرىنشىلىكتە ءوزىن جاقسى  جاعىنان  كورسەتە ءبىلدى. قارسىلاسى وزبەك بوكسشىسى باحودير دجالولوۆپەن  وتكەن جىلى تاشكەنتتە وتكەن  ايتۋلى جارىستا  قولعاپ  ءتۇيىستىرىپ، جەڭىلىستىڭ اششى ءدامىن تاتقان بولاتىن. بۇل جولى ەسە قايىرۋ ءۇشىن ايانباي بارىن سالدى. قامشىبەك قارسىلاسىن ءۇشىنشى راۋندتا اۋىر سوققىلاردىڭ استىنا الىپ، 3:2 ەسەبىمەن جەڭىسكە جەتتى. جارتىلاي فينالدا كامەرۋننان كەلگەن ارسەن فوكتى اسا قيىندىقسىز تىزە بۇكتىردى. چەمپيوندىق ايقاستا ءازىربايجاننىڭ ۇكىلەپ جۇرگەن بوكسشىسى ماگومەدراسۋل مەدجيدوۆپەن شارشى الاڭعا شىقتى. ءوزارا تارتىستى وتكەن سايىستى جۇرت تەڭ اياقتاعانعا بالاعان. بىراق تورەشىلەر مەدجيدوۆتىڭ ءسال عانا باسىمدىقپەن جەڭىسكە جەتكەنىن حابارلاعاندا قامشىبەكتىڭ قولىنان التىن جۇلدەنىڭ سۋسىپ شىعىپ كەتكەنىن بايقاعان جانكۇيەرلەر ونىڭ الداعى بىرىنشىلىكتەردە ەسە قايتاراتىنىنا بەك  سەندى. جالپى بىرىنشىلىك ەسەبىندە 5 التىندى قانجىعالارىنا بايلاعان كۋبا بوكسشىلارى ءبىرىنشى ورىنعا كوتەرىلسە، وزبەكستان جىگىتتەرى 1 التىن، 3 كۇمىسپەن ەكىنشى ورىندى يەمدەندى. ال ءبىزدىڭ بىلعارى قولعاپ شەبەرلەرىمىز 1 التىن، 2 كۇمىس، 1 قولا جۇلدەمەن ءۇشىنشى ورىندى قاناعات تۇتتى.

استانادا ايتۋلى بوكس كەشى

قازىرگى  كۇندەرى «قازاق» قانات يسلام باستاعان ايتۋلى كاسىپقوي بوكس شەبەرلەرى «ەكسپو – 2017» حالىقارالىق كورمە اۋماعىندا وزدەرىنىڭ سوڭعى جاتتىعۋلارىن وتكىزۋدە. 9 قىركۇيەك كۇنى ولار استانا تورىندە قارسىلاس  بىلعارى  قولعاپ  شەبەرلەرىمەن قولعاپ تۇيىستىرەدى. جانقوش تۇراروۆ، جانىبەك ءالىمحان ۇلى، رۋسلان مىرساتاەۆ، ايدوس ەربوسىن ۇلى، نۇرسۇلتان جاڭاباەۆ تۋعان جەردە  ءوز شەبەرلىكتەرىن تانىتپاق. بۇل كەزدەسۋدە ەڭ باستى جەكپە-جەك قانات يسلام مەن كانادالىق برەندون كۋكتىڭ اراسىندا وتپەكشى. قاناتتىڭ ايتۋىنا قاراعاندا، قارسىلاسى وسال ەمەس. ول وسى كەزدەسۋگە دەيىن 18 رەت شارشى الاڭعا شىعىپ، بارىندە جەڭىسكە جەتكەن. ال قانات يسلام قارسىلاستارىمەن 24 رەت قولعاپ ءتۇيىستىرىپ، ونىڭ 19-ىندا مەرزىمىنەن بۇرىن جەڭىسكە جەتسە، قالعاندارىن ۇپاي سانىمەن ۇتقان. ەل نامىسىن قورعاپ، بايراقتى كوك جالاۋدى جەلبىرەتىپ جۇرگەن قانات باۋىرىمىزدىڭ بۇل جولى دا جەڭىسكە جەتىپ، قالىڭ قازاقتىڭ سەنىمىن اقتايتىنى كامىل.

 

 

 

ۇقساس جاڭالىقتار

Back to top button