جاپونيا جۇرگىزۋشىسىز جۇرەتىن تراكتور شىعارماق

جاپونيا پرەمەر-ءمينيسترى سيندزو ابە جۋىق ارادا اۋىلشارۋاشىلىق جۇمىستارىندا پايدالانۋعا بولاتىن جۇرگىزۋشىسىز تراكتورلاردى تانىستىردى. بۇل تۋرالى تاسس-قا سىلتەمە جاساپ قازاقپارات حابارلادى. 

جاڭا تەحنيكانىڭ تۇساۋى كيوتو قالاسىندا جەكسەنبى كۇنى جۇمىسىن باستاعان عىلىم جانە قوعامداعى تەحنولوگيالار حالىقارالىق فورۋمىندا كەسىلدى. بىرنەشە تراكتوردىڭ قوزعالىسى تۇسىرىلگەن ۆيدەو تۋرالى اڭگىمەلەي كەلە: «قاراڭىزشى، ولار جاي ۇيلەسىممەن عانا ءجۇرىپ جاتقان جوق، ءتىرى ادامدار سەكىلدى ءبىر-بىرىمەن تىلدەسىپ جاتقانداي. بولاشاقتا ولار كەڭ قولدانىسقا بەرىلەدى»، – دەدى ابە.

جاپون ۇكىمەتىنىڭ باسشىسى يننوۆاتسيالار مەن جاڭا تەحنولوگيالاردىڭ دامۋى جەكەلەگەن ەلدەردىڭ عانا ەمەس، بۇكىل الەمنىڭ بولاشاعىن ايقىندايدى.

«مەن بارشامىز بىرىگە وتىرىپ، الەمدى جاقسارتامىز دەپ سەنەمىن»، – دەدى ول. ەجەلگى جاپون استاناسى كيوتو قالاسىندا جەكسەنبى كۇنى عىلىم جانە قوعامداعى تەحنولوگيالار حالىقارالىق فورۋمى باستالدى. اتالعان بەدەلدى شارا وسىمەن 14-ءشى رەت الەمنىڭ 150-دەن استام ەلىنەن كەلگەن ءبىر جارىم مىڭنان استام عالىم مەن كاسىپكەردىڭ، سونداي-اق ساياسات جانە قوعام قايراتكەرلەرىنىڭ باسىن قوسىپ وتىر.

 

ۇقساس جاڭالىقتار

Back to top button