Әкесінен айырылған отбасыға қаржылай қолдау болуы тиіс болған өтемақы бөтен адамның қолында кеткен. Арада бірнеше жыл өткен соң, Ақтөбе прокуратурасы сот арқылы мүгедектігі бар ана мен оның үш кәмелетке толмаған баласына тиесілі 25 млн теңгені қайтаруға қол жеткізді, деп хабарлайды turkystan.kz.
Қайғылы оқиға 2021 жылы болған. Үш баланың әкесі өндірістегі жарақат салдарынан қаза тапқан. Жұмыс беруші отбасыға келтірілген зиянның өтемақысы ретінде 25 млн теңге төлеген. Алайда бұл қаражат өзіне тиесілі адамдарға жетпеген. Ақшаны балалардың әжесі алған және іс қарау барысында анықталғандай, оны жеке мақсаттарына жұмсаған.
«Прокуратура отбасының құқықтарын қорғау мақсатында сотқа жүгінді. Ақтөбе облысының кәмелетке толмағандар істері жөніндегі мамандандырылған ауданаралық сотының 2026 жылғы 25 мамырдағы шешімімен талап арыз қанағаттандырылып, жауапкерден 25 млн теңге өндірілді. Сот шешімі заңды күшіне енді. Отбасының бұзылған мүліктік құқықтары қалпына келтірілді», – деп хабарлады Ақтөбе облысы прокуратурасының баспасөз қызметі.
Ақтөбе қаласының прокуратурасы кәмелетке толмағандардың құқықтары мен заңды мүдделерін қорғау бойынша жұмысты жалғастыруда.
