Ресейде алаяқтардың марқұм адамдардың пәтерін заңсыз иемденуге бағытталған жаңа схемасы туралы ескерту жасалды, деп хабарлайды turkystan.kz.
РИА Новости агенттігінің мәліметінше, қаскөйлер жалған құжаттар арқылы жылжымайтын мүлікке бақылау орнатып, кейін оны жалға беруге тырысады.
Ресей ІІМ дерегіне сәйкес, алаяқтар өздерін қайтыс болған адамның алыс туысы ретінде таныстырып, нотариусқа мұрагерлікке құқық алу жөнінде өтініш береді. Егер ұсынылған құжаттар сырттай дұрыс көрінсе, нотариус заң бойынша мұрагерлік ісін ашуға міндетті.
Осыдан кейін күдіктілер түрлі құжаттарды пайдаланып, пәтерге қол жеткізеді. Кей жағдайларда олар барлық тексеру аяқталмай тұрып-ақ тұрғын үйді жалға беріп үлгереді.
Мамандар мұндай схемаларға бірнеше адамның қатысуы мүмкін екенін айтады. Әсіресе ірі қалаларда мұндай жағдайлар жиі тіркеліп жатыр.
Заңгерлердің пікірінше, марқұмның жақын туыстары болмаған және пәтер ұзақ уақыт бос тұрған жағдайда қауіп күшейе түседі. Алаяқтар көбіне дәл осындай мүліктерді нысанаға алады.
Айта кетейік, Қазақстанда мұндай схема бойынша жаппай алаяқтық факілері әзірге тіркелмеген. Дегенмен жылжымайтын мүлік саласының мамандары цифрлық құжат айналымы мен қашықтан рәсімдеу қызметтері көбейген сайын осындай қауіптер жергілікті нарықта да пайда болуы мүмкін екенін ескертеді.
Сарапшылар қайтыс болған адамның туыстарына мұрагерлік рәсімдерін кешіктірмей жүргізуге және мүліктің құқықтық мәртебесін тұрақты бақылауда ұстауға кеңес береді.
