Біріккен Ұлттар Ұйымының Халықаралық еңбек ұйымы (ILO) жариялаған жаңа есепке сәйкес, жұмыс орнындағы психоәлеуметтік қауіптер жыл сайын әлемде 840 мыңнан астам адамның өліміне себеп болады, деп хабарлайды turkystan.kz.
Зерттеуде ұзақ жұмыс уақыты, жұмыстың тұрақсыздығы, буллинг пен қысым көрсету сияқты факторлар адамның физикалық және психикалық денсаулығына айтарлықтай зиян келтіретіні айтылған. Мұндай тәуекелдер көбіне жүрек-қан тамыр аурулары мен психикалық бұзылыстарға, соның ішінде суицидке әкеледі.
Сарапшылардың пікірінше, психоәлеуметтік қауіптер қазіргі еңбек нарығындағы ең өзекті мәселелердің біріне айналған. Олар еңбек жағдайын жақсарту тек қызметкерлердің денсаулығын қорғау үшін ғана емес, сонымен қатар өнімділік пен экономикалық тұрақтылық үшін де маңызды екенін атап өтті.
Есепте көрсетілгендей, жұмысқа байланысты денсаулық проблемалары жыл сайын шамамен 45 млн «сау өмір жылын» (DALY) жоғалтуға әкеледі. Бұл өз кезегінде жаһандық ішкі жалпы өнімнің шамамен 1,37%-ының жоғалуына әсер етеді.
Дүниежүзілік денсаулық сақтау ұйымы дерегіне сүйенсек, депрессия мен мазасыздық салдарынан жыл сайын 12 млрд жұмыс күні жоғалады. Ең жиі кездесетін мәселелердің қатарында күйзеліс, ұйқының бұзылуы, шаршау және кәсіби күйіп кету бар.
Сонымен қатар, есепте жұмыс уақытының ұзақтығы негізгі қауіп факторларының бірі екені айтылған. Әлемде қызметкерлердің шамамен 35%-ы аптасына 48 сағаттан артық жұмыс істейді. Ал аптасына 55 сағаттан көп жұмыс істеу инсульт қаупін 35%-ға, жүрек ауруынан қайтыс болу қаупін 17%-ға арттырады.
Жұмыс орнындағы қысым мен зорлық-зомбылық та кең таралған: қызметкерлердің 23%-ы еңбек жолында кемінде бір рет осындай жағдайға тап болған.
Сарапшылар цифрландыру, жасанды интеллект және қашықтан жұмыс істеу еңбек ортасын түбегейлі өзгертіп жатқанын атап өтіп, ұйымдарды жұмыс жағдайын қайта қарауға шақырады. Олардың пікірінше, еңбек жүктемесін дұрыс бөлу, жұмыс уақытын реттеу және психологиялық қолдау жүйесін енгізу – басты шешімдердің бірі.
