Құлақ ішіне кіріп тұратын құлаққаптарды жиі пайдалану құлақтың табиғи микрофлорасын бұзып, зиянды бактериялардың көбеюіне қолайлы орта қалыптастырады. Зерттеулер нәтижесі осыны көрсетіп отыр, деп хабарлайды turkystan.kz medicalxpress.com-ға сілтеме жасап.
Әдетте құлаққаптың зияны тек қатты дыбыс салдарынан есту қабілетінің төмендеуімен байланыстырылады. Алайда мамандардың айтуынша, негізгі қауіп – есту арнасының физикалық түрде жабылуы. Пластик тығындар құлақ ішіндегі табиғи желдету жүйесін бұзып, кір мен бактериялардың жиналуына себеп болады.
Қалыпты жағдайда құлақ арнайы қорғаныш сұйықтығын бөледі. Ол теріні ылғалдандырып, инфекциядан сақтайды. Сонымен қатар ұсақ түктер мен құлық бөгде бөлшектерді сыртқа шығарып отырады. Құлаққап тағу осы тепе-теңдікті бұзып, микробтарды жылы әрі ылғалды ортада «қамап» қояды.
Зерттеулерге сәйкес, мұндай құрылғыларды тұрақты қолданатын адамдарда пайдалы бактериялардың әртүрлілігі азаяды. Нәтижесінде саңырауқұлақ және бактериялық инфекциялар қаупі артады. Әсіресе құлаққапты басқа адамдармен бөлісу бұл тәуекелді күшейтеді.
Мәселе спорт кезінде одан әрі ушығады: силикон тығындар «парник әсерін» туғызады: температура мен ылғалдылық өседі. Бұл қабыну мен іріңді процестерге әкелуі мүмкін. Дәрігерлер суық тигенде немесе құлақ ауырғанда құлаққап қолданбауға кеңес береді.
Алдын алу үшін мамандар құлаққапты үнемі тазалап, дезинфекциялауды және пайдалануда үзіліс жасауды ұсынады. Балама ретінде есту арнасын жаппайтын, дыбыс өткізетін құрылғыларды қолдануға болады.
