University College Cork ғалымдары бала кезде дұрыс тамақтанбау ми қызметіне және тамақтану мінез-құлқына ұзақ мерзімді әсер етуі мүмкін екенін анықтады. Зерттеу нәтижелері Nature Communications журналында жарияланған, деп хабарлайды turkystan.kz.
Мамандардың айтуынша, тәттілер мен майы көп тағамдар балалар өмірінің қалыпты бөлігіне айналған. Мұндай рацион бастапқыда артық салмақ қоспауы мүмкін. Алайда ұзақ мерзімде семіздік қаупін арттырып, тәбетті реттейтін ми аймақтарының жұмысына өзгеріс енгізуі ықтимал.
Эксперимент барысында ғалымдар жас кезінен майлы әрі тәтті тағаммен қоректендірілген зертханалық тышқандарды бақылаған. Ересек шақта олардың гипоталамус қызметінде бұзылыс байқалған – бұл ми бөлігі тәбет пен энергия алмасуды реттеуге жауап береді. Соның салдарынан жануарларда тамақтану тәртібі өзгерген.
Зерттеу кезінде тышқандарға Bifidobacterium longum APC1472 деп аталатын пробиотикалық штамм берілгенде, олардың тамақтану мінез-құлқы жақсарған. Ал пребиотиктер қосылған рацион ішек микробиомына одан да оң әсер еткен.
Ғалымдар дұрыс емес тамақтанудың салдарын өмір бойы толық жою мүмкін болмаса да, оны жұмсартуға болатынын айтады. Ол үшін рационға пияз, сарымсақ, порей пиязы, банан, спаржа сияқты табиғи пребиотик көздерін қосу, сондай-ақ пробиотиктер қолдану ұсынылады.
