Температура күрт төмендегенде суық тек теріде ғана емес, бүкіл денеде сезіледі. Қалтырау, бұлшықеттің сіресуі, саусақтардың ұюы, кеуде тұсының «мұздап» тұрғандай әсері – аязда ұзақ жүрген адамға таныс жағдай. Мұндай кезде тек сырттан емес, іштен де жылыну маңызды, деп хабарлайды turkystan.kz health.mail.ru-ға сілтеме жасап.
Жылынудың ең жылдам әрі табиғи тәсілі – қозғалыс. Үлкен бұлшықеттер іске қосылғанда ағза жылуды белсенді өндіре бастайды. Жылдам жүру, бірнеше рет отырып-тұру, қолды сермеу немесе аяқтың ұшына көтерілу жеткілікті. 2–3 минуттық жеңіл, бірақ қарқынды қимылдың өзі қан айналымын жеделдетіп, денені іштен жылытады.
Маңыздысы – ұзақ суықта тұрғаннан кейін күрт, шалт қозғалыстар жасамау.
Суықта тыныс алу жиі үстірт әрі ретсіз болады. Бұл тіндерге оттегінің аз түсуіне және тоңу сезімінің күшеюіне әкеледі. Мұрынмен баяу терең дем алып, ауызбен тыныш шығару жағдайды тұрақтандырып, қан айналымын жақсартады.
Көп адам алдымен алақанын ысқылайды немесе қалтаға салады. Алайда жылдам жылыну үшін кеуде, іш және бел тұсын қорғау маңыздырақ. Дәл осы аймақтарда ірі қан тамырлары орналасқан. Киімді толық түймелеп, мойын мен белді жауып, қолды денеге тақап ұстасаңыз, саусақтар өздігінен жылына бастайды.
Жылы жерге кіре салысымен ыстық душқа немесе батареяға жақындау дұрыс емес. Температураның күрт ауысуы тамырларға салмақ түсіреді. Ең тиімдісі – біртіндеп жылыну: құрғақ киім, жылы (бірақ ыстық емес) шай, қалыпты жылы бөлме.
Жылы сусындар ішкі температураны көтеріп, жайлылық сезімін береді.
Зейінді басқаға аударыңыз. Суықты қабылдау жүйке жүйесіне де байланысты. Адам тоңғанын ойлай берген сайын, суық күштірек сезіледі. Әңгімеге араласу, музыка тыңдау, тынысқа немесе қозғалысқа назар аудару тоңу сезімін азайтады.
Бұл тәсіл қозғалыспен бірге қолданылса, әсері тіпті күштірек болады.
