Қыс мезгілінде ағза тек суықпен емес, ішкі биологиялық күреске де түседі. Күннің қысқаруы мен температураның төмендеуі метаболизмді баяулатып, «қуат беретін» майлы әрі тұзды тағамдарға деген тәбетті күшейтеді. Алайда ғалымдардың айтуынша, дәл осы әдет иммунитетті әлсіретіп, ағзаны қосымша стресс жағдайына түсіреді, деп хабарлайды turkystan.kz.
Зерттеулер көрсеткендей, қыста майлы және қуырылған тағамды шамадан тыс тұтыну бауыр мен ұйқыбезге артық салмақ түсіреді, ал трансмайлар (маргарин, спред, кондитерлік өнімдер) жасуша мембраналарына «еніп», пайдалы заттардың сіңуін нашарлатады. Бұл жүрек-қантамыр жүйесіне де, терморегуляцияға да кері әсер етеді.
Фастфуд, жартылай дайын өнімдер мен тәтті газдалған сусындар қысқа мерзімді сергектік әсерін бергенімен, қандағы қанттың күрт ауытқуын және созылмалы қабынуды күшейтеді. Ал тұздың артық мөлшері (чипсы, тұздалған өнімдер) ағзада суды ұстап, қан айналымын баяулатады. Алкоголь, керісінше, жылуды тез жоғалтып, дәрумендер мен минералдардың қорын азайтады.
Пермь политехникалық университетінің ғалымдары қыста рационның «қауіпсіз өзегін» ақуызды өнімдер құрауы тиіс екенін атап өтеді. Ет, балық, жұмыртқа мен бұршақ тұқымдастар иммундық қорғанысты қолдап, тұрақты энергия береді. Майлы теңіз балығы омега-3, D дәрумені, йод пен мырыштың көзі ретінде маусымдық аурулардың қаупін төмендетеді.
Сонымен қатар жаңғақтар, тұқымдар, жидектер мен жемістер антиоксиданттармен қамтамасыз етіп, ішек микрофлорасын және жылу алмасуын жақсартады. Шөп шайлары, дәмдеуіштер, су мен көкөністер шырышты қабаттарды қорғап, ағзаның энергияны тиімді пайдалануына көмектеседі.
Мамандардың түйіні біреу: әмбебап «идеал» қысқы мәзір жоқ. Жас, денсаулық жағдайы, физикалық белсенділік пен созылмалы аурулар тағам таңдауын анықтайды. Бірақ бір қағида айқын – қыста ауыр, өңделген және артық тұзды тағамды азайту иммунитет пен энергияны сақтаудың ең қарапайым әрі тиімді жолы.
