Жаңа зерттеу нәтижесі бойынша май мен қантқа бай тағам есте сақтау қабілетін әлсіретеді, ал кофеин бұл әсерді азайта алмайды. Physiology & Behavior журналында жарияланған зерттеу тамақтану әдеті мен ми қызметі арасындағы күрделі байланысты нақтырақ түсіндіреді, деп хабарлайды turkystan.kz Psypost-қа сілтеме жасап.
Ғалымдар соңғы жылдары тамақ құрамының ми жұмысына әсерін жиі зерттей бастады. Бұған дейінгі жануарларға жасалған тәжірибелерде май мен қанттың көптігі гиппокамп деп аталатын ми аймағына әсер етіп, есте сақтау мен үйрену процестерін әлсірететіні анықталған. Енді сол құбылыс адамдарда да байқалуда.
Зерттеу екі бөлек тәжірибеден тұрды. Біріншісіне 18-45 жас аралығындағы 1 000 ерікті қатысты. Қатысушылардың тамақтану, кофе ішу және есте сақтау әдеттері сауалнама арқылы бағаланған. Нәтижесінде май мен қантты көп тұтынатындар күнделікті ұмытшақтыққа жиі шағымданған. Ал кофе ішетіндерде бұл байланыс әлсірегенімен, статистикалық тұрғыда айқын қорғаныш әсері байқалмады.
Екінші тәжірибеге 699 адам қатысып, оларға қосымша есте сақтау тесті, сөз жұбын есте сақтау тапсырмасы берілді. Бұл тәжірибеде жоғары майлы, тәтті тағам жегендердің тек субъективті емес, нақты есте сақтау қабілеті де төмен болғаны анықталды. Ал кофе тұтыну бұл нәтиженің ешқайсысына әсер етпеді: кофе ішетіндер мен ішпейтіндерде есте сақтау көрсеткіштері бірдей деңгейде болды.
Ғалымдар кофенің сергектікті арттыратыны рас, бірақ оның есте сақтау қабілетіне ұзақ мерзімді оң әсері дәлелденбегенін айтады. Бұрынғы жануарларға жасалған зерттеулерде кофеин ми қабынуын азайтуы мүмкін деген болжам болғанымен, адам ағзасында мұндай қорғаныш қасиет анықталмаған.
Зерттеу шектеулері де бар: қатысушылардың тамақтану және кофе ішу әдеттері өз мәліметтеріне сүйеніп бағаланған, бұл дәлдікке әсер етуі мүмкін. Сонымен қатар, зерттеу негізінен жас әрі дені сау адамдар арасында жүргізілді, ал кофеиннің әсері егде жастағы немесе денсаулығында кінәраты бар адамдарда өзгеше болуы ықтимал.
Ғалымдар келешекте осындай зерттеулерді нақты бақылау әдістерімен және әртүрлі жас топтарында жүргізу қажеттігін айтады. Қысқаша түйін: кофе сергітуі мүмкін, бірақ ол фастфудтың миға зиянын өшіре алмайды.
