32 мың адамның қатысуымен жүргізілген халықаралық зерттеу адамдардың жылтыр және глянцті тауарларды мат өнімдерге қарағанда 72% қымбатқа сатып алуға бейім екенін көрсетті, деп хабарлайды turkystan.kz journals.sagepub.com-ға сілтеме жасап.
Ғалымдардың айтуынша, мидың визуалды қабылдау механизмі жылтыр заттарды «жаңа», «таза» және «жақсы күтімді» деп бағалайды. Сондықтан тұтынушы саналы түрде емес, автоматты түрде жылтырға тартылады.
Зерттеу нәтижесі қызық бір жайтты ашты: бұл әсер тіпті қолданылған (second-hand) тауарларға да тарайды. Жылтыр беті бар тауарлар онлайн жарнамаларда 63% көп қаралым мен басу (клик) жинайды.
Зерттеу авторлары мұны «жаңалық әсері» деп түсіндіреді: жылтыр бет тауардың жаңа екенін немесе сапасының жақсы екенін меңзейді. Ал уақыт өте сапасы артатын (мысалы, шарап, антиквариат, былғары бұйымдар сияқты) өнімдерде, керісінше, жылтыр тұтынушы бағасын төмендетеді.
Ғалымдар мұндай тұжырымдар өндірушілер мен маркетологтар үшін маңызды екенін айтады: жылтыр әсерін дұрыс пайдалану бренд имиджін күшейтіп, тұтынушы қызығушылығын арттыруға көмектеседі.
