Сенат депутаты Бибігүл Жексенбай Мемлекет басшысының бүгін ел халқына жолдаған Жолдауындағы маңызды мәселелерге тоқталып өтті, деп хабарлайды turkystan.kz.
«Қасым-Жомарт Тоқаевтың 2025 жылғы Жолдауы – тек дәстүрлі президенттік үндеу емес, ол елдің келешегін айқындайтын стратегиялық бағдарлама. Бұл жолдау Қазақстанның болашағы үшін нақты тапсырмалар, ұлттық идеялар мен технологиялық бағыттарды бір арнаға тоғыстырады», – дейді Сенат депутаты.
Бибігүл Жексенбай Жолдауда сөз етілген цифрландыру мен жасанды интеллект – жаңа ұлттың тірегі екенін баса айтты.
«Жолдаудың өзекті идеясы – елімізде цифрландыруды кеңінен енгізу және жасанды интеллектіні барлық салаларға тиімді пайдалану. Президент бұл мәселені тек технологиялық жаңалық ретінде емес, ұлттық мүдде, экономикалық және әлеуметтік даму факторы ретінде қойды: «Цифрландыру – болашақ елдің интеллектуалдық қауіпсіздігі», – деді Қасым-Жомарт Кемелұлы. Бұл қадам Қазақстанды технологиялық дамуда алдыңғы қатарға шығарып, әлемдік деңгейде бәсекеге қабілетті етеді. Шетелдік тәжірибе көрсеткендей, дамыған мемлекеттер өз стратегияларын цифрландыру мен инновация арқылы нығайтады. Мысалы, Сингапур мен Оңтүстік Корея жасанды интеллектіні мемлекеттік басқаруда тиімді қолдануда, бұл олардың экономикалық өсімін қамтамасыз етіп отыр. Қазақстан да осындай жолға түсті», – дейді Б.Жексенбай.
Сенат депутатының айтуынша, білім мен мамандарды қолдау – ұлттық капитал
«Жолдауда жоғары білімді мамандарды елде қалдыру және шетелдік мамандарды тарту мәселесі «айқын көрініс тапты. Бұл бағыт – Абай даналығының бүгінгі көрінісі: «Білімді ел – мәңгі жасайтын ел». Бәсекеге қабілетті еңбек нарығы, әділ жалақы, кәсіби өсу мүмкіндіктері – тек мемлекеттің ғана емес, әрбір азаматтың болашағына сенімділік сыйлайды», – дейді Сенат депутаты.
Сонымен қатар, ол Президенттің халыққа Жолдауында бір палаталы Парламент құру туралы бастама көтергеніне тоқтала кетті.
«Мемлекет басшысы Парламенттің бір палаталы жүйесін талқылауға шығаруды ұсынды. Бұл бастама демократияны жетілдіру жолындағы батыл қадам. Дамыған елдердің тәжірибесі көрсеткендей, бір палаталы парламент тиімді шешім қабылдауға мүмкіндік береді. Қазақстан да саяси жүйесін жаңартып, қоғамдық диалог пен заңнамалық сапаны күшейтуді мақсат етеді», – дейді Сенат депутаты.
Депутат сөз соңында Мемлекет басшысының жыл сайын халыққа жолдайтын Жолдауының маңызына тоқталып өтті.
«Жолдау – тек міндеттер жиынтығы емес. Бұл – елдің ұлттық идеясына негізделген, стратегиялық бағыт беретін құжат. Ол цифрлық даму, білім, еңбек, саяси жүйе сияқты барлық бағыттарды бір арнаға тоғыстырады. Осы жолдаудағы әр тапсырма – елдің тұрақтылығы мен дамуына, азаматтардың сеніміне арналған нақты қадам.
Жолдау – қағазда қалмай, іске асырылуы тиіс. Елдің әр азаматы, әр ұйым бұл бағыттарды түсініп, іске қосқанда ғана Қазақстан жаңа белестерге жетеді. Бұл – ұлттық мүдде, экономикалық өсу және әлеуметтік әділеттілікті қамтамасыз ететін, елді болашаққа дайындайтын маңызды стратегиялық бағдарлама», – дейді Бибігүл Жексенбай.
