Қарағандыда Кеншілер күніне орай ұйымдастырылған концертте рекорд тіркелген, деп хабарлайды turkystan.kz.
Аталған концертті 120 мың адам тамашалаған. Бұл туралыҚарағанды облысы әкімінің орынбасары Әлібек Әлденей мәлімдеді.
"Қарағанды десе, Алаш алыптары Әлихан Бөкейхан, Әлімхан Ермеков, әйгілі әнші-күйшілер Күләш Байсейітова, Мағауия Хамзин, екінші дүниежүзілік соғыстың қаһарман батырлары Қазбек Нұржанов пен Нұркен Әбдіровтер бірден ойға оралады. Ұлы тұлғаларға тұғыр болған бұл өлкенің топырағы ежелден-ақ киелі.
Құйқалы өңір жер астындағы мол қазынасымен де танымал. Көмір өнеркәсібі бүгінде облыс экономикасының 2,8%-ын, ал жалпы өндіріс көлемінің 6,4%-ын құрайды.
Өңіріміздегі 10 шахтадан соңғы 7 айда 21,6 млн тонна көмір өндірілген, оның 4,5 млн тоннасы Ресей, Қырғызстан, Беларусь, Өзбекстан сынды алыс-жақын шет елдерге экспортталады. Жалпы, көмір өндіруде облыста тұрақты оң динамика байқалады. Былтыр 20,4 млн тонна өндірілсе, биыл ол көрсеткіш 5,8%-ға артты. Бұл – қайласы қайыспас қара нарларымыздың жемісі!", — дейді облыс әкімінің орынбасары.
Кеншілер күніне орай Қарағанды облысында 40-қа жуық түрлі форматтағы іс-шаралар ұйымдастырылды. Облыс орталығында 120 мыңға жуық адам тамашалаған ауқымды концерттік бағдарлама ұйымдастырды. Бүгін Шахтинск, Абай және Саран қалаларында мерекелік шаралар жалғасуда.
"Шара аясында көрермен қауым әртістеодің өнерін тамашалап қана қоймай, жеті қат жер астынан қара алтын өндіретін кеншілеріміздің мемлекеттік наградалармен марапатталған сәтінің куәсі болады.Осындайда киелі өлкеміздің өр рухты ақыны Саттар Ерубаевтың:
«Отанымның от азығын жер астында сайлаймын
Мен қайламды, қайратымды тас көмірге қайраймын
Қайраған сайын қайлам өтер, қайратым да тасиды
Маған тас та, жер де, су да тәжім қылып бас иді», деген жыр шумағы есіме түседі.
Құрметті кеншілер!
Сіздер жанқиярлық ерлікті талап ететін күрделі де қауіпті мамандықты игеріп, ел игілігі үшін тынымсыз еңбек етіп келесіздер. Өрістеудің өзегі – өздеріңіз. Ел экономикасының еңсесін тіктеп, халықтың әл-ауқатын арттыру жолында қажымас қайрат, мұқалмас жігер, баянды бақыт тілеймін!Өндірістеріңіз өрісті, өмірлеріңіз жемісті болсын!", – дейді Ә.Әлденей.
