«Радуга» балалар шығармашылығы студиясының тәрбиеленушісі Айару Кимағанбет «Baqytty Bala-2025» VI ашық балалар вокалдық фестиваль-байқауынан жеңіспен оралды. Оған «Dimash Dears» арнайы сыйлығы берілді, деп хабарлайды turkystan.kz сайты Lada.kz-ке сілтеме жасап.
Ашық балалар вокалдық фестиваль-байқауы «Baqytty Bala-2025» екі кезеңнен тұрды.
Биыл байқауға Чехия, Франция, Ұлыбритания, Колумбия, Латвия, Беларусь, Молдова, Татарстан, Қырғызстан, Ресей, Өзбекстаннан және Қазақстанның Батыс Қазақстан, Алматы, Атырау, Маңғыстау, Қарағанды, Ақтөбе облыстарынан, сондай-ақ Ақтау, Астана, Павлодар, Орал, Петропавл, Алматы, Атырау, Қызылорда, Талдықорған, Қарағанды, Көкшетау, Семей, Тараз қалаларынан 220 жас вокалист өтініш берген.
Іріктеу кезеңінің қорытындысы бойынша 19 мықты орындаушы финалға жолдама алды.
– «Baqytty Bala» – Ақтөбе облысының брендіне айналған бірегей балалар жобасы. Биыл біздің өңірді байқауда Айару Кимағанбет пен Әмина Асғатова таныстырды. Қазылар алқасының шешімімен Айару «Dimash Dears» арнайы сыйлығына және 100 000 теңге сертификатына ие болды. Айару біздің студияда 2016 жылдың қыркүйегінен бері тәрбиеленіп келеді. Осы уақыт ішінде ол жан-жақты шығармашылық даму алды. Оған вокал, сахналық шеберлік және хореография пәндерінің ұстаздары (О.Н. Черкашина, В.А. Литау, А.В. Ким) тәлім береді. Айару – жарқын, талантты, өте қабілетті әрі белсенді қыз. Оның жеке репертуары бар, қазақ, орыс, ағылшын және басқа да тілдерде ән орындайды, – деді «Радуга» балалар шығармашылығы студиясының жетекшісі Ольга Хныкина.
Оның айтуынша, Айару Кимағанбет – қалалық және облыстық концерттер мен мерекелік шаралардың тұрақты қатысушысы, қалалық, облыстық, республикалық және халықаралық байқаулар мен фестивальдердің бірнеше дүркін жеңімпазы. Ол жеке әнші ретінде де, «Әуен» вокалдық тобының солисті ретінде де өнер көрсетеді.
Байқауда Айару екі ән орындады – «Үміт өмір» (туған тілінде) және «Lady Marmalade» (әлемдік хит). Қазылар алқасы қатысушының жақсы дайындық деңгейін, харизмасын, музыкалық материалды сауатты орындауын, сахналық шеберлігін және табиғи сұлулығын атап өтті.
