Гонконг мектебінің төрт оқушысы қоғам игілігіне арналған идеялар байқауында жеуге болатын биологиялық жолмен ыдырайтын пластик жасап шығарған. Орта буын оқушылары арасында өткен "Seek Our Ways" Әлеуметтік Идеялар Бағдарламасы байқауында жеңіске жеткен бұл жоба тек инновация ғана емес, сонымен қатар болашаққа деген үміттің белгісі деп бағаланып отыр, деп хабарлайды turkystan.kz scmp-қа сілтеме жасап.
Жас өнертапқыштар қоршаған ортаны сақтауға бағытталған, тағам өнімдерін қаптауға жарамды, биологиялық ыдырайтын және жеуге болатын композит материал ойлап тапқан. Бұл экологиялық қауіпсіз балама қазіргі таңда кеңінен қолданылатын пластиктің орнына пайдалануға мүмкіндік береді.
Байқауды Гонконг Жастар Федерациясының Лидерлік Институты ұйымдастырып, Hang Seng Bank қолдау көрсетті. Бағдарлама оқушылар мен студенттерді қоршаған ортаны қорғау, инклюзивті спорт, қартаю мен денсаулық тақырыптарында жаңа идеялар жасауға шабыттандыруды мақсат етеді.
