Аустралияда жасалған алғашқы 23 метрлік зымыран екі күн қатарынан ұша алмады, ұшу алаңына тотықұс кіріп, кабельдерді кеміріп тастаған, деп хабарлайды turkystan.kz news.com.au-ға сілтеме жасап.
Электр жүйесіндегі ақауға не себеп болғанын анықтау кезінде күтпеген «күдікті» қолға түсті.
Gilmour Space Technologies компаниясы өзінің 23 метрлік Eris зымыранын мамырдың 15-і күні Боуэндегі мал жайылымынан ұшырмақ болған. Алайда жерүсті қолдау жүйесінен ақау табылған соң процесс тоқтатылды.
Келесі күні қайта ұшыру жоспарланғанымен, электрлік ақау зымыранның мұрын қақпағын өздігінен ашуға мәжбүрледі. Gilmour Space компаниясы өзінің Боуэндегі ұшыру алаңында электр сымдарын шайнап жатқан тотықұстың суретін жариялады.
«Электрлік ақауларымызға дәл осы себеп болды деп айтпаймыз… бірақ оны да есептен шығарып тастаған жоқпыз», — деді компания өкілі.
