Алматының «Қайрат» футзал клубы Францияның Ле-Мана қаласында өткен Чемпиондар лигасының жартылай финалында Испанияның қазіргі чемпионы «Картахенаны» жеңді, деп хабарлайды BAQ.KZ.
«Қайрат» сенсациялық жеңіске жетіп, финалға жолдама алды — 3:2.
Қазақстандық команданың сапында Алиссон дубль авторы атанса, тағы бір голды 39-минутта қақпашы Деннис Кавальканти соқты. Ал испаниялықтар қатарынан Мигель Анхель Мельядо (20-минут) және Габриэль Мотта (40-минут, пенальтиден) мергендік танытты.
Финалда «Қайрат» Испанияның «Пальмасымен» кездеседі. Клуб жартылай финалда Португалияның «Спортингінен» басым түсті.
«Қайрат» бұған дейін Чемпиондар лигасын екі рет жеңіп алған (ол кезде турнир УЕФА Кубогы деп аталатын): 2013 және 2015 жылдары.
