Жамбыл облысында жүгері өңдейтін зауыттың құрылысы басталды. Бұл – ауыл шаруашылығы өнімдерін өңдеу, экономиканы әртараптандыру үшін қолға алынған маңызды бастаманың бірі.
Зауыттың іргетасын қалау рәсіміне Жамбыл облысының әкімі Ербол Қарашөкеев қатысып, бұл жоба еліміздің агроөнеркәсіп кешеніндегі жаңа бетбұрыс екенін айтты.
– Мемлекет басшысы Қасым-Жомарт Тоқаев өңделген ауыл шаруашылығы өнімдерінің үлесін 70 пайызға дейін жеткізу жөнінде нақты тапсырма берді. Бұл – сол міндеттің нақты іске асуының жарқын мысалы. Зауыт қосылған құны жоғары өнім шығаратын біртұтас жүйе қалыптастырады, – деді аймақ басшысы.
Инвестициялық жобаның жалпы құны – шамамен 420 миллиард теңге. Бастапқы кезеңде зауыт жылына 500 мыңнан 1 миллион тоннаға дейін жүгері өңдеуге қауқарлы болса, болашақта бұл көрсеткіш 3 миллион тоннаға дейін артады деп жоспарланып отыр.
Жобаның бастамашысы – биоөнімдер өндіруде жаһандық тәжірибесі бар Қытайдың ірі Fufeng Group компаниясы. Компания биылдың өзінде-ақ 2026 жылдың өндірісіне қажет 300 мың тонна жүгері сатып алуды көздеп отыр. Осы мақсатта жамбылдық шаруалармен офтейк-келісімшарттар жасалады.
Зауытта жүгері өңделіп, аминқышқылдары (лейцин, валин, изолейцин, глутамин, цитрулин), крахмал, глюкоза секілді өнімдер өндіріледі. Сонымен қатар өндірісте қалдықсыз технология қолданылады: қалдықтар мал азығына айналмақ.
Құрылыс кезеңінде шамамен
6 000 адам жұмыспен қамтылады, ал зауыт іске қосылғаннан кейін алғашқы кезеңде 400, жалпы алғанда 1 500 тұрақты жұмыс орны ашылады.
Fufeng Group Limited басқарма төрағасы Ли Сюэчунь өз сөзінде Жамбыл облысының инвестициялық әлеуеті жоғары екенін айтып, жобаның жүзеге асуына жағдай жасаған жергілікті билік пен Үкіметке алғысын білдірді.
Жалпы, Жамбыл облысының инвестициялық қоржынында 3,6 триллион теңгеге бағаланатын 82 жоба бар. Бұл жобалар 10 мыңнан астам жұмыс орнын ашуды көздейді. 2025 жылдың алғашқы үш айында өңірге 120,5 миллиард теңге инвестиция тартылып, өткен жылдың осы кезеңімен салыстырғанда 37,1 пайызға өсім тіркелді. Жыл соңына дейін жалпы құны 175,2 миллиард теңгеге 30 инвестициялық жобаны іске қосу жоспарда бар.
