Ресейдің соңғы патшасы ІІ Николайдың анасы Мария Федоровнаға тиесілі болған сирек кездесетін жақұт Швейцарияда аукционға қойылады. Құны 1,5 миллион фунт стерлингке дейін бағаланған асыл тас 1903 жылы Қысқы сарайда өткен әйгілі костюмді балда императрицаның киімін безендірген. Бұл туралы The Independent басылымы хабарлады, деп хабарлайды turkystan.kz.
Sotheby’s аукцион үйінің мәліметінше, «Романовтар сапфирі» деп аталатын асыл тастың салмағы 197,8 карат. Ол Цейлон аралынан, қазіргі Шри-Ланка аумағынан табылған. Ерекшелігі – сапфирдің түсін жақсарту үшін ешқашан термиялық өңдеу жүргізілмеген.
Асыл тастың құндылығын арттыратын тағы бір ерекшелік – оның тарихи тағдыры. 1903 жылы Ресей империясының Қысқы сарайында өткен салтанатты балға Мария Федоровна осы сапфирмен безендірілген киім киіп келген. Қонақтардың барлығы XVII ғасырдағы орыс ақсүйектерінің тарихи киім үлгісінде болған. Бұл кеш кейін Ресей империясының соңғы дәуіріндегі ең әйгілі салтанаттардың бірі ретінде тарихта қалды.
1917 жылғы революциядан кейін сапфир кеңес билігі сатылымға шығарған императорлық қазыналардың қатарына енген. Кейін ол опера әншісі Ганна Вальсканың зергерлік бұйымдар коллекциясында сақталған. Ал 2015 жылы Cartier зергерлік үйі сапфирді гауһар тастармен безендірілген білезікке орнатқан.
Бүгінде Романовтар әулетінің қазынасына тиесілі екені құжаттармен расталған асыл тастар өте аз сақталған. Сондықтан бұл сапфир коллекционерлер үшін ғана емес, тарихшылар үшін де құнды жәдігер саналады.
11 қарашада Женевада өтетін аукционда еуропалық ақсүйектерге тиесілі басқа да зергерлік бұйымдар ұсынылады. Олардың арасында 1937 жылы Ұлыбритания королі VI Георгтің таққа отыру салтанатына арнап жасалған болуы мүмкін Cartier тиарасы бар. Қара опал тастарымен безендірілген бұл әшекейді Девоншир герцогинясы 1953 жылы ІІ Елизаветаның таққа отыру рәсімінде таққан. Оның болжамды құны 1 миллион фунт стерлингке жуық.
Сондай-ақ аукционға кезінде британдық ақсүйек Кэтрин Уолстонға тиесілі болған сапфир, зүбәржат және гауһар тастармен безендірілген сақина шығарылады. Оның бағасы 454 мың фунт стерлингке дейін жетуі мүмкін.
Sotheby’s өкілдерінің айтуынша, мұндай әшекейлердің құндылығы тек асыл тастардың сиректігінде емес, олардың бұрынғы иелерінің тарихымен де байланысты.
The Independent
