Таза ауада серуендеу – тек сергектік сыйлайтын уақыт өткізу тәсілі емес, жан мен тәннің үйлесімділігін сақтауға бағытталған табиғи терапия.
Қазіргі кезде адамдардың көбі уақытын жабық кеңселер мен ғимараттара өткізеді. Алайда табиғат аясында серуендеу – тек демалыс емес, денсаулықтың маңызды көзі екенін ғылым әлдеқашан дәлелдеген. Таза ауада серуендеудің нақты қандай пайдасы барын ғылыми зерттеулерден қарастырып көрейік.
1. Психикалық денсаулықты жақсартады
2015 жылы Proceedings of the National Academy of Sciences журналында жарияланған зерттеуге сәйкес, табиғат аясында 90 минут серуендеген адамдарда мидың жағымсыз ойларға жауап беретін бөлігінің (subgenual prefrontal cortex) белсенділігі төмендегені байқалған. Бұл – депрессия белгілерін азайтуға көмектесетін маңызды көрсеткіш.
2. Қан қысымын және жүрек соғысын тұрақтандырады
Жапониялық ғалымдар «орман моншасы» (shinrin-yoku) деп аталатын әдісті зерттеу барысында орман ішінде серуендеу қан қысымын төмендетіп, жүрек соғысын тұрақтандыратынын анықтаған. 2010 жылы Environmental Health and Preventive Medicine журналында жарияланған зерттеуге сәйкес, орманда жүрген адамдардың ағзасындағы стресс гормондары (кортизол) айтарлықтай төмендеген.
3. Шығармашылық пен зейінді арттырады
University of Utah және University of Kansas ғалымдары жүргізген 2012 жылғы зерттеуде табиғатта 4 күн бойы жүрген адамдардың шығармашылық ойлау қабілеті 50%-ға артқаны анықталған. Табиғат адамның миына демалуға мүмкіндік беріп, назар аудару, ден қою қабілетін күшейтетіні белгілі болды.
4. Иммундық жүйені күшейтеді
2009 жылы Жапониядағы Nippon Medical School университетінің профессоры Цин Ли орманда серуендеу кезінде ағзада табиғи өлтіруші жасушалардың (NK-клеткалар) белсенділігі артатынын дәлелдеген. Бұл жасушалар вирус пен ісік жасушаларын жоюда маңызды рөл атқарады.
5. Ұйқы сапасын жақсартады
Stanford University зерттеушілері 2017 жылы күнделікті табиғи жарық пен таза ауада жүру адамның ұйқы ырғағын тұрақтандырып, ұйқыға кету уақытын қысқартатынын айтқан. Табиғаттағы жарық-көлеңке ауысуы мелатонин гормонын реттеп, табиғи ұйқы цикліне оң әсер етеді.
Таза ауада серуендеу – тек сергектік сыйлайтын уақыт өткізу тәсілі емес, жан мен тәннің үйлесімділігін сақтауға бағытталған табиғи терапия. Ғылыми зерттеулердің өзі табиғаттың адам денсаулығына тигізетін оң әсерін мойындап отыр. Күніне кемінде 30 минут серуендеуді әдетке айналдырсаңыз, сіз тек денсаулығыңызды нығайтып қоймай, өмір сапасын да арттырасыз.
