Боксшы қыздардың сыналатын тұсы – олимпиада

Еліміздің қыздар боксының болашағы туралы спорт журналисі Бек Төлеуовтың шағын пікірін ұсынып отырмыз.

Сербияда өткен әлем чемпионатында Қазақстанның боксшы қыздары 3 алтын, 2 күміс, 1 қола алып, жалпы есепте екінші орын алды. Әлемге танымал Назым Қызайбай үш дүркін әлем чемпионы атанды. Бұл – қазақ боксы үшін рекорд. Еліміздің қыздар боксының болашағы туралы спорт журналисі Бек Төлеуовтың шағын пікірін ұсынып отырмыз.

– Қазір екі бірдей халықаралық бокс қауым­дастығына мүшеміз. Сербиядағы әлем чемпионатын IBA ұйымдастырды. Ен­ді жаңадан құрылған World Boxing бар. Қа­лай боларын уақыт көрсетер. Екі ұйым­ның әлем чемпионаты екі бөлек өтеді. 
Боксшы қыздардың Сербиядағы жетіс­ті­гіне, әрине, қуаныштымыз. Назым Қы­зай­бай үш дүркін әлем чемпионы атанып, жаңа тарихтың бетін ашты. Сондай-ақ Аида Әбікеева мен Алуа Балқыбековалар қуантты. Соңғы екеуі алғаш рет әлемнің үздігі ата­нып отыр. Бірақ бұған тоқмейілсуге бол­май­ды. Боксшы қыздардың сыналатын тұсы – Олимпиада. Әзірге Қазақстанның бокс­шы қыздарына Олимпиаданың алты­ны жетпей тұр. Тек үш қоламыз бар. Сон­дық­тан осы қыздардың кемі біреуі 2028 жы­лы Лос-Анджелесте топ жарса екен дей­мін.
Сербиядағы бұл жетістік – боксшы қыз­дардың ішкі атмосферасы қайта дұрыстала бас­тағанын көрсетті. Өйткені бір кездері құра­мада бір-бірімен шаш жұлысып, БАҚ беттерін шулатқан жағдайлар өте көп бол­ды. Назым Қызайбай мен Ангелина Лукас­тың арасындағы жағдайды көпшілік ұмыта қойған жоқ. Жаңа бас бапкер ішкі бірлікті реттей алғаны көрініп тұр. Соған қуаныш­ты­мыз.
Бір айта кететін жайт, Назым Қызайбай әлем чемпионатындағы үш алтынын да 48 келіге дейін салмақта жеңіп алды. Оған 51 ке­лі сәл қиындық тудыратын сияқты. Ал Олим­пиада ойындарына 48 келі деген сал­мақ қосылмаған. Лос-Анджелеске берілетін жалғыз жолдама осы Назым мен Алуа ара­сында өтуі мүмкін. Бәлкім, оған дейін қа­тарға жас боксшылар да қосылып қалуы ық­тимал.
2016 жылы Астанадағы әлем чемпио­на­тын­да қазақ боксшы қыздары 4 алтын ал­ған. Бірақ одан кейін ол жетістікті қай­тал­мақ тұрмақ, жақындаудың өзі қиындаған. Сондықтан алдағы уақытта Сербиядағы же­тістігімізден айырылмау маңызды.