Қытай ЖИ қалаларын салуға жұмылды

Қытай ЖИ-ді дамытуға бар күш-жігерін сала бастады. Елдің оңтүстігіндегі Шэньчжэнь қаласы ауқымды мегажобаға – тұтас бір жасанды интеллект қаласына айналмақ.

Бұл жоспар ЖИ негізіндегі жоғары тех­нологиялық салаларды да­мы­туға серпін бермек. Негізгі стратегия – AI+X, яғни жасанды интеллект барлық са­ла­ларға енгізілуде: өндіріс, медицина, қар­жы, логистика, тіпті туризмге дейін. Қы­тай бұл технологияларды жай ғана сы­нақтан өткізіп қоймай, ауқымды түр­де дамытып жатыр: субсидиялар бөліп, мә­ліметтерге қолжетімділікті жеңіл­детуде. 
Шэньчжэнь қаласы ЖИ терминал­дары индустриясын 2026 жылға қарай 1 триллион юаньға (шамамен 139,38 мил­лиард АҚШ доллары) дейін кеңейту жө­ніндегі іс-қимыл жоспарын жа­рия­ла­ды. Нақтырақ айтқанда, алғашында ЖИ технологиясын қолдану арқылы 800 миллиард юань (112 миллиард АҚШ дол­лары) көлемінде қосымша өнім шы­ғару жоспарланып отыр, ал болашақта бұл көрсеткіш 1 триллион юаньға дейін жетуі мүмкін. Бір жыл ішінде бұл жерде есеп­теу қуаты 80 экзафлопсқа жететін 3 мың ЖИ-компаниясы пайда болады. Сондай-ақ стартап жобаларға арналған тегін индустриалдық парктер ашылады. 
Сонымен қатар жоспар аясында ке­мінде 10 жетекші ЖИ-ге негіз­дел­ген өнеркәсіптік кәсіпорын құру, сон­дай-ақ смартфондар, компьютерлер сияқ­ты салаларда 50-ден астам инно­ва­циялық өнім шығару көзделген. Сондай-ақ ақылды қаржы, ақылды өндіріс және ақылды медицина салаларында 60-тан астам ЖИ қолданбаларын әзірлеу жос­парланып отыр. Қала «ақылды құрал­дар­дан» «интеллектуалды көмекшілерге» ай­налатын құрылғыларды шығаратын ке­шенді өнеркәсіп экожүйесіне айна­ла­ды. Олар ақылды үй, денсаулық сақтау, қауіпсіздік және өнеркәсіптік автомат­тан­дыру салаларында кеңінен қолданы­латын болады. Бұл жаңалықтар бизнесті жә­не тұтынушыларды қолдауға бағыт­тал­­ған жеке қызметтерді ұсынуға мүм­кін­дік береді.
Қала әкімшілігі ресурстарды тиімді бөлу, бизнес ортаны оңтайландыру және ЖИ индустриясын тұрақты дамыту үшін қаржылық қолдау көрсету арқылы осы жоспарды жүзеге асыруға ниетті.
Технология және стратегия ғы­лыми-зерттеу институтының ви­це-президенті Чэнь Цзиннің айтуын­ша, Шэньчжэнь Қытайдағы ЖИ эко­жүйе­сінің алдыңғы шебінде тұр. Global Times мәліметінше, ол көптеген жетекші компанияның дамуына негіз болып, өзге қалаларға үлгі болады.
Негізгі бастамалардың қатарында ЖИ саласындағы мамандарды даярлау, де­ректер қауіпсіздігіне инвестицияларды арт­тыру және саланы стандарттау процестерін күшейту де бар. 
Чэнь Цзиннің айтуынша, осындай сая­сат бұрын да қаланың өндірістік тіз­бегін нығайтуға, шағын және орта кә­сіп­орын­дарға жаңа мүмкіндіктер беруге және экожүйенің тұрақтылығын арт­ты­ру­ға көмектескен.
Шэньчжэнь жеке сектордың бел­сен­ді қолдауына сүйене отырып, жасанды интел­лект технологиясының жаңа қол­да­ну салаларын анықтауды жалғастыра­ды. 
Шэньчжэньмен қатар, Қытайдың басқа қалалары да ЖИ-ге не­гіз­делген жаңа индустрияларды да­мы­туға бағытталған осыған ұқсас сая­сат­тар­ды жүзеге асырып жатыр. Хубэй про­винциясының орталығы Ухань ұлт­тық жасанды интеллект ин­но­ва­ция­лық аймағы ретінде белгіленіп, «ЖИ+ әре­кет» жоспары жарияланды. Бұл жос­пар аясында Уханьның ЖИ-ге негіз­дел­ген өнеркәсіптік өндірісі 70 миллиард юаньға жетеді деген сенім бар.
Сонымен қатар Бейжің, Чэнду және бас­қа да қалалар жасанды интеллект ин­новациясын дамытуға арналған ар­найы саясаттар қабылдап, таланттарды қолдау, инфрақұрылымды жетілдіру және нарықтық өсуді ынталандыру ба­ғы­тында жұмыс жүргізуде.
Қала билігінің мәліметінше, жер­гі­лік­ті үкіметтердің жасанды интеллектке де­ген белсенді ұстанымы бұл саланың кең ауқымды дамуына ықпал етеді. Осы про­цесте аймақтық үкіметтер белсенді қа­дамдар жасаса, айтарлықтай нәти­же­лерге қол жеткізуге болады.

P.S. 
Осылайша, басқа елдер экожүйе дамытуды енді жолға қойып жатқанда, Шэньчжэньде инфрақұрылым жарық жылдамдығымен құрылып, жасанды интеллект бойынша оқыту ваучерлері таратылып жатыр. Логика қарапайым: ресурс қолжетімді болса, даму да болады.