Маңғыстау облысында Бейнеу аудандық орталық ауруханасының қабылдау бөліміне 9-12 жас аралығындағы 11 бала жедел-жәрдеммен жеткізілген.
Олардың барлығында құсу мен әлсіздік болған. Оқиға кешкі мезгілде сағат 19:05 — 23:00 аралығында болған.
Бейнеу ауданы әкімі баспасөз қызметінің хабарлауынша, балалар 2,3 және 5-сынып оқушылары.
«Дәрігерлер қарап, балаларды үйлеріне қайтарды. Ауруханаға жатқызылғандар жоқ. Қазіргі уақытта оқушылардың денсаулығы бірқалыпты, амбулаторлық бақылауда», — делінген хабарламада.
Ал, Бейнеу аудандық санитариялық — эпидемиологиялық бақылау басқармасының мамандары осы оқиғадан кейін, жедел тергеп-тексеру жүргізіп, азық-түліктерден сынамалар алған. Оқушылардың неден ауырғанын анықтау үшін, санитариялық профилактикалық іс-шаралар жүргізіліп жатыр.
