ДДСҰ басшысы жаңа пандемияға ертеңнен бастап дайындалуға шақырды. Әлемде қауіпті аурудың жаңа пандемиясы ертең басталып кетуі мүмкін, деп хабарлады turkystan.kz.
Бұл туралы Дүниежүзілік денсаулық сақтау ұйымының (ДДСҰ) бас директоры Тедрос Аданом Гебрейесус ескертті. Ол елдерді пандемияның алдын алу жөніндегі келісімді әзірлеу жұмысын жандандыруға шақырды.
ДДСҰ-ға мүше мемлекеттердің елшілері алдында сөйлеген сөзінде ол "COVID-19 пандемиясы қазір қақтығыстар, геосаяси және экономикалық күйзелістер аясында алыстағы естелік сияқты көрінеді", - деп атап өтті. - "Алайда келесі пандемия әлемдегі жағдайдың тұрақтануын күтпейді. Ол 20 жылдан кейін де болуы мүмкін, ертең де басталып кетуі ғажап емес. Біз оған дайын болуымыз керек. Сондықтан да әлем сіздердің қатысуларыңыз бен көшбасшылықтарыңызға мұқтаж. ДДСҰ-ның пандемияға қарсы келісімін соңына дейін жеткізу керек", – деді Гебрейесус.
Еске салайық, Дүниежүзілік денсаулық сақтау ұйымының директоры Тедрос Аданом Гебрейесустың ұлы Эммануэль ақын Жүрсін Ерманның Ардақ деген қызынан туған жиені Айданаға үйленген.
