Шымкент қаласында 1999 жылы тамызда болған кісі өлтіру қылмысы ашылды, деп хабарлады turkystan.kz Polisia.kz порталына сілтеме жасап.
Осыдан 25 жыл бұрын жер үйден зорлық-зомбылық белгілері бар зейнеткер әйелдің мәйіті табылған еді. Сараптама қорытындысы оның тұншықтырылып өлтірілгенін көрсетті. Қажетті дәлелдердің жетіспеуінен қылмыс ұзақ уақыт бойы ашылмай келген.
Алайда тергеушілер күдіктінің ізіне түсті. Ол көршілес елде тағы бір аса ауыр қылмыс жасап, қазіргі уақытта түрмеде жазасын өтеп жатыр. Реадмиссия арқылы күдікті Шымкент қаласына жеткізіліп, қамауға алынды.
Қазір бұл іске қатысты “Адам өлтіру” бабы бойынша сотқа дейінгі тергеу басталды, — деді Криминалдық полиция департаменті бастығының орынбасары Руслан Назаров.
Сонымен қатар 2009 жылы үш адамға оқ атқан және 16 жыл бойы іздеуде болған күдікті де ұсталды. Сол оқиға кезінде бір адам қаза тапқан. Тергеу мәліметінше, жанжалға қаржылық келіспеушіліктер себеп болған.
Қазіргі таңда күдікті қамауға алынып, қылмыстық іс сотқа жіберілді.
