Алматыда жол апатынан әйел адам қаза тапты
Адам өліміне әкелген жол-көлік оқиғасы фактісі бойынша қылмыстық іс қозғалды
Әйел адам Алматыдағы Әл-Фараби даңғылында аударылып кеткен көлік апатында қаза тапты. Оқиға орнынан түсірілген бейнежазбаны Tengrinews.kz редакциясына оқырмандар жіберді.
Жергілікті полиция қызметінің кезекші бөлімі мәлімдегендей, жол-көлік оқиғасы бүгін таңғы сағат 5:30-да Алматының Бостандық ауданында болған.
“Toyota маркалы автокөлігінің 20 жастағы жүргізушісі Әл-Фараби даңғылымен батыс бағытта қозғалып келе жатып, Қаратаев көшесімен қиылыста рөлге ие бола алмай, жолдың солтүстік жиегіне шығып, бордюр тасына соғылған. Кейін қозғалысын жалғастырып, тротуарға шығып, жаяу жүргінші – 39 жастағы әйелді қаққан. Одан әрі жарнама қалқанының тіреуішіне соғылып, төңкеріліп кеткен,” – деп хабарлады Алматы полициясы.
Жол-көлік оқиғасы салдарынан жаяу жүргінші оқиға орнында қаза тапты. Көлік жүргізушісі мен оның жолаушысы қаладағы ауруханалардың біріне жеткізілді. Адам өліміне әкелген жол-көлік оқиғасы фактісі бойынша қылмыстық іс қозғалды.
