Ұлттық банк базалық мөлшерлемені 15,25% деңгейінде қалдырды
Шешім қабылдау кезінде ішкі және сыртқы орта, инфляциялық және экономикалық процестер ескерілген.
Ұлттық Банктің Ақша-кредит саясаты комитеті базалық мөлшерлемені 15,25% деңгейінде сақтау туралы шешім қабылдады.
Шешім қабылдау кезінде ішкі және сыртқы орта, инфляциялық және экономикалық процестер ескерілген.
Сыртқы ортада баға қысымы күшейіп тұр. Оған еліміздің негізгі сауда-серіктесі — Ресейде инфляцияның күшеюі себеп. Оның үстіне, соңғы айларда жетекші экономикаларда инфляция үдеп келеді. Соның өзі әлемдегі ставкалардың ұзақ уақыт жоғары болып қалуына себеп болып отыр. Бұл өзгерістер доллардың нығаюына әсер етті. Дамушы елдердің валюталарына, оның ішінде теңгеге де қысым күшейіп келеді.
Ішкі экономикадағы инфляциялық факторларды атасақ, олар: фискалдық ынталандырудың жалғасуы; тұрғын үй коммуналдық қызметтер тарифінің өсуі; теңгенің әлсіреуі; тұтынушылық сұраныстың тұрақты артуы.
Осы факторлар тәуекел балансын проинфляциялық жаққа ығыстырып келеді.
Желтоқсанның қорытындысы бойынша жылдық инфляция 8,6%-ке жетті. Инфляцияға қызметтер мен азық-түлікке жатпайтын тауарлар көптеп үлес қосуда. Азық-түлік инфляциясы бір жылда тұрақты болғанымен, соңғы екі айда үдей бастады.
2024 жылғы желтоқсанда азық-түлік тауарларының бағасы 5,5%-ке өсті. Азық-түлікке жатпайтын тауарлар бағасының өсуі 8,3%-ке дейін жеделдеді. Ақылы қызметтер инфляциясы 13,3% деңгейінде тұрақтанды.
Ал реттелетін коммуналдық қызметтердің бағасы жылдық көрсеткіште 21,1%-ке өсіп, нарықтық қызметтер инфляциясы 11,5% болды.
