Ақмола облысында заңсыз балық аулаған браконьерлер ұсталды

Полицейлер бір аптаның ішінде ұлттық саябақтың аумағында браконьерліктің үшінші фактісін анықтады, деп хабарлады turkystan.kz.

2024 жылдың 22 қыркүйегінде Біржан-Сал полиция бөліміне сағат 23:00 шамасында “Бурабай” МҰТП Темноборский орманшылығының Жүкей көлінде заңсыз балық аулаудың кезекті фактісі анықталғаны туралы телефон хабарламасы келіп түскен.

Хабарламада Щучинск – Степняк – Уәлиханов автожолындағы орманшылық қызметкерлері Түркістан облысының 40 жастағы тұрғынының басқаруымен ГАЗ 31105 автокөлігін тоқтатқаны көрсетілген. Оқиға орнына дереу жеткен жедел-тергеу тобы ер адамның көлігінің жүксалғышын тексеру барысында 4 қапшықтан тұқы тұқымды балықты, резеңке қайықты, балық аулау торларын тапты. Бұл жолы браконьерлердің олжасы 160 келіден астам балық болған. Балық ресурстарын заңсыз өндіру фактісі бойынша сотқа дейінгі тергеу жүргізіліп жатыр.