642
Ақпейіл Өсім велоспорттан Азия чемпионатында топ жарды
Аталмыш додада жеңіске жеткен велошабандоздар Қазақстан намысын абыроймен қорғады.
Бүгін Алматы қаласында тас жолдағы велоспорттан Азия чемпионатының кезекті жарыс күні өтті, деп хабарлады turkystan.kz Спортты дамыту дирекциясының баспасөз қызметіне сілтеме жасап.
23 жасқа дейінгі қыздар арасындағы 112,6 шақырым болатын топтық жарыста Ұлттық құрама спортшылары қос жүлде жеңіп алды. Отандасымыз Ақпейіл Өсім мәре сызығын 2:56:51 уақыт көрсеткішімен бірінші болып кесіп өтсе, Елизавета Склярова қола медаль иеленді. Күміс индонезиялық Девика Соваға бұйырды.
«Бірінші келгеніме әлі де сене алмай тұрмын. Жарыс барысында қарсыластармен ғана емес, ыстық ауа-райымен де күресуге мәжбүр болдық. Бірақ, сонда да жеңілмеуге тырыстық. Мақсатымызға қол жеткіздік, қуаныштымын», - деді Ақпейіл Өсім.
Азия чемпионаты ертең аяқталады.
