Ақтөбелік тұрғын арзан бағада шырша аламын деп алаяққа алданып қалған
Әйел мобильді ұсыныстың көмегімен ақшаны көрсетілген банк деректемелеріне аударған.
Ақтөбелік тұрғын арзан бағада шырша аламын деп алаяққа алданып қалған, деп хабарлады turkystan.kz.
Polisia.kz сайтының мәліметінше, Ақтөбе қаласы полиция басқармасына 46 жастағы жергілікті тұрғын белгісіз біреуге жалпы құны 63 мың теңге көлемінде ақша аударғаны туралы өтінішпен жүгінді.
«Жүргізілген іс-шаралар барысында жәбірленуші Instagram әлеуметтік желісінде жаңа жылдық шырша сату туралы жарнаманы көрген. Оған құны 63 мың теңге болатын 2,5 метрлік жасанды шырша сатып алу ұсынып, үлкен жеңілдік жасалып, тегін жеткізілетіні туралы уәде еткен. Тауарды сатып алудың міндетті шарты 100% алдын ала төлем екені көрсетілсе де, сатып алушы күмәнданбаған. Әйел мобильді ұсыныстың көмегімен ақшаны көрсетілген банк деректемелеріне аударған», - делінген хабарламада.
Алайда осы уақытқа дейін шырша жіберілмегені және олардан ешқандай жауап қайтарылмағаннан кейін алданғанын түсінген.
Бұл факті биылғы жылы бірінші рет болып отырған жоқ. Полицияға әлеуметтік желілер арқылы сатып алу кезінде алаяқтардың әрекеттерінен зардап шеккендерден күн сайын өтініштер келіп түседі. Осы факті бойынша тексеру жүргізілуде, орын алған оқиғаның барлық мән-жайлары анықталып жатыр.
