Қызылорда қаласында абайсызда қалалық кәріз құдығына құлап кеткен сегіз жасар баланың мәйіті сыртқа шығарылды, деп хабарлады turkystan.kz Қызылорда облыстық Төтенше жағдайлар департаментіне сілтеме жасап.
Бүгін, 25 қарашада сағат 13.24-те Қызылорда облысы Төтенше жағдайлар департаменті Дағдарыс жағдайларында басқару басқармасына хабарлама келіп түскен.
«Онда облыс орталығындағы Балқы базар көшесі бойында орналасқан №5 емхананың жанында жасөспірім абайсызда қалалық кәріз құдығына түсіп кеткені айтылған. Сағат 18:00-де құтқарушылар күшімен 2015 жылғы баланың мәйіті кәріз құдығынан табылып, сыртқа шығарылды. Оқиға орнында департаменттің 18 қызметкері 5 техникамен жұмыс жасады. Сондай-ақ апаттар медицинасы орталығының филиалы, Полиция департаменті, «Қызылорда су жүйесі», жергілікті атқарушы орган мамандары қызметін атқарды», - делінген хабарламада.
