«АМАNAT» партиясының «Ұлттық мұра»партиялық жобасы аясында М.Әуезов атындағы педагогикалық колледжде Шәкәрім Құдайбердіұлының туғанына 165 жыл толуына орай «Ұлт ақыны – Шәкәрім» атты қоғамдық дәрісі өтті. Іс-шараға өңірдегі зиялы қауым өкілдері, жастар, партия филиалының қызметкерлері және т.б. қатысты.
Тарихи-танымдық іс-шараны ашқан Абай облыстық мәслихатының депутаты Шағангүл Жанаева «АМАNAT» партиясы елдікке үндейтін бірқатар жобаны қолға алғанын алға тартты.
«Бұл жобалардың барлығы – халыққа қажет, жастардың тәрбиесіне ықпал ететін бірден-бір тиімді бастамалар. Биыл еліміз үшін өткен жылдағыдай атаулы даталарға толы. Мерейтойлар аясында халқымыздың мерейін үстем ететін игілікті шаралар көп болады деген үміттеміз. Бүгінгі іс-шара бірегей тұлға Шәкәрім Құдайбердіұлының 165 жылдығына арналып отыр», - деді Жанаева.
Партияның Абай облыстық филиалының атқарушы хатшысы Думанғазы Арғынғазин жобаның мақсаты мен міндеттеріне тоқталып, іс-шараны өткізудің маңыздылығын атап өтті.
«АМАNAT» ұлттық құндылықтарды дамыту бағытында өткізілетін партиялық іс-шараларды жүйелеу және біріздендіру мақсатында «Ұлттық мұра» партиялық жобасы қолға алғанын білесіздер. Бүгін қоғамдық дәріс түрінде өтіп жатқан іс-шара халқымыздың 1920-1930 жылдардағы қасіретті тарихынан сыр шертеді. Тарихтан тағылым алып, болашағымызды бағамдау үшін жас буынға осындай дәрістер өте қажет деп есептеймін», - деді атқарушы хатшы.
Жоба аясында атқарылатын жұмыстың форматы әртүрлі. Қоғамдық дәрісті филология ғылымдарының кандидаты, «Абай және ұлттық руханият» ғылыми-зерттеу орталығының жетекші Ақмарал Смағұлова жүргізді. Ол Шәкәрім Құдайбердіұлы туралы тың деректер ұсынып, ақын мұралары жөнінде мазмұнды баяндама жасады. Сондай-ақ «Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығы» қызметкерлері қатысушыларды «Шәкәрім әлемі» атты көрмемен таныстырды.
Алдағы уақытта осындай мазмұнды дәрістерді өзге білім ордаларының қабырғасында ұйымдастыру жоспарланып отыр.
